雷聲大雨點小嘅煲呔造勢晚會喺一片抗議聲、噓聲同喝（倒）采聲中落幕，挺煲呔嘅人話呢個騷冇得頂，八方現場直擊，一般街坊卻睇到眼火爆，話下次再有呢啲政治騷唔使預佢哋。民主派質疑煲呔違規向選民提供娛樂，不過觀眾可以做證，呢方面唔慌「砌」得入，因為場騷冇娛樂成份可言，悶到爆就有份，成晚得班政客喺台上噴口水，歌星出場又係口擘擘合唱三首無厘頭歌，煲呔呢場政治騷囊括「爛紫荊獎」多個大獎，實至名歸。
師奶猛呻悶爆
多得民建聯幫手喺各屋邨「吹雞」召集互委會師奶撐場，前晚個場先人頭湧湧，有師奶同八方呻個騷好「流」，報紙寫黎明、古巨基到場，佢以為好似《勁歌金曲》咁有氣氛，點知班歌星變晒人肉布景板，全個騷煲呔由頭帶到尾，全程講爛gag，話自己似殭屍真係冇人識笑，「爛紫荊最佳男主角」頒畀佢不作他選。
另一個拎住吹氣棒拍到「ponpon」聲嘅靚太搭嗲，「乜特首老婆條原子褲咁肉酸！」原來佢睇到曾太着住條湖水藍色花紋長褲，隻色就襯嘞，不過花紋怪雞，似平時着去灣仔街市買餸打扮，「娘爆服裝指導獎」就畀佢啦。
政治騷悶冇所謂，最緊要全情投入做好呢場騷，寶哥哥就交唔足戲嘞，大合唱時，八方見佢擘大個口得個窿，「咪」嘴都慳番，肯定係「爛紫荊最佳男配角」。熟讀俄國戲劇理論大師史坦尼斯拉夫斯基著作嘅星爺則好戲得多，佢改變主意唔開口挺曾，不過站台時都好投入嗌口號，做老臨都冇交行貨。
群星out歌趕客
唔少人同八方一樣，以為黎明、古巨基、方力申同Stephy係全晚焦點，點知佢哋無厘頭只係唱人哋嘅歌，喺晚會唱嘅三首歌《強》、《奮鬥》同《千個太陽》真係out到爆；配樂唔啱聽，道具組都有呃飯食之嫌，「執政聯盟」六個頭頭被安排捧住六個分別寫住安定、繁榮、和諧、共融、進步同求新嘅大波上台，即刻變身遊戲節目「歡樂先生」，八方初時仲以為六合彩攪珠㖭！全個騷唯一值得讚嘅係「天星女鬥士」何來，佢爬牆嗌大聲公抗議搶晒鏡，「飛躍大獎」非佢莫屬。
爛紫荊獎得獎名單
最佳監製：北京阿爺
最佳男主角：煲呔
最佳男配角：寶哥哥
最佳老臨：星爺
娘爆服裝指導：曾太
無厘頭配樂：金牌群星、天濛光
最搞笑道具：執政聯盟「六合彩」
飛躍大獎：何來
