特首選舉前夕，小童群益會搞咗個「兒童投票選特首」活動，實行大有大做，細有細投。估唔到𠵱家啲學生咁熱心政治，共有1,070個小四至中三嘅學生網上投票。被封為至尊無賴嘅賭王早排「提醒」選委「咪投白票，一定查得出」，賭王豪情壯語言猶在耳，班小朋友竟然當耳邊風冇有怕，有69人投咗白票，真係莫欺少年窮。
細路哥點揀？煲呔有817票，袋巾有184票，嚟自元朗光明英來小學六年班嘅黃芷欣話：「我最想香港盡快實行雙普選！袋巾支持民主，肯聽我哋兒童嘅聲音，又會幫殘疾人士同老人家，所以咪投佢囉！」八方聽完為之動容，芷欣你好嘢！