蕭定一旗下幾位整容代言人知名度日增，最近也急着爭寵爭風頭，上映一齣整容界《金枝慾孽》。甄穎珊前晚在變靚D的春茗晚會上大晒硬膠胸出盡風頭，吳文忻與石詠莉只好結伴做孖公仔，但二人接受訪問竟又互踩暗寸，石詠莉否認割雙眼皮，直言整容不自然，又指胸大不代表完美，而吳文忻則暗寸石詠莉整容不敢認，毫不畀面謂：「接受唔到唔好做呢行。」連鄭嘉穎都幫手倒米，表示如果是其女友就：「唔整好過整。」
吳文忻及甄穎珊兩位整容代言人，前晚於沙田明星海鮮舫出席《變靚D──完全變靚春茗晚會》，石詠莉、肥媽瑪莉亞、鄭嘉穎及陳煒等修身代言人也有出席。吳文忻、石詠莉及甄穎珊前晚風騷滿場飛招呼客戶，其中又以大騷硬膠胸的甄穎珊最搶鏡，輕露乳溝的吳文忻則與密實石詠莉做孖公仔，似刻意孤立甄穎珊，但二人竟又面和心不和，互寸對方。
詠莉刀功當化妝
石詠莉早前到韓國做割雙眼皮手術，她卻否認其事，還暗寸吳文忻與甄穎珊，她說：「我冇整呀，只係化妝咋，係人都知我不嬲係雙眼皮。」對於她早前曾揚言考慮割雙眼皮，石詠莉急急澄清說：「當時我係話考慮整走眼角嘅疤，係細個打波時撞親嘅。」
談到是夜甄穎珊最搶鏡，問石詠莉會否隆胸？她即說：「着衫唔係胸大先至完美，均勻就OK，我有Ccup，唔使去到D同E，所以暫時唔考慮。」問她是否覺得甄穎珊身材誇張，石詠莉說：「我冇話佢誇張，只係自己冇需要整。我希望自己自然啲，媽咪畀我嘅嘢我都好鍾意，中國人鍾意自然，化妝cover到就唔好改變。」
整容代言人吳文忻也大讚石詠莉眼睛變大，其後得知對方否認整容時，即一臉愕然說：「咁得意？佢冇整？唔係認咗㗎咩？我都係睇報紙咋，每次見佢都靚過之前。其實我係代言人做咗會認，其他人做咗唔認都得，尊重人哋決定啦。」
文忻死撐：我sell鼻
對於可擔心整容代言人地位動搖？文忻說：「唔只我一個代言，我sell鼻，甄穎珊sell胸，接受唔到嘅就唔好做呢行。」談到是日身材輸蝕，文忻說：「今日又唔係比賽。」說罷她望着自己胸部說：「我賣樣唔係賣呢度。」後來文忻又謂做好份內事，就不怕被師妹威脅，她說：「唔好爭住邊個贏邊個，為公司做嘢千祈唔好內訌。」
整容後被指像蔡少芬的甄穎珊，聞得石詠莉指胸大不代表完美，她說：「人人意見唔同，最緊要睇着乜衫，我唔介意佢咁講。」至於被指硬膠胸，她則說：「我今晚第一晚戴鐵線bra，之前戴nudebra嘛，我背脊冇肉，出嚟效果係誇張啲。」
嘉穎倒米急補鑊
鄭嘉穎於開席後才出現，他謂未正式見過幾位整容靚女，問他是否接受整容隆胸，嘉穎說：「呢啲個人自由，覺得有自信咪自己決定囉。」如果是其女友呢？嘉穎謂：「我唔知就冇問題，俾我知做咗就唔好，唔整好過整。」他意識自己在倒米，遂補鑊說：「但係我知整咗又自然嘅，都接受到。」
採訪、攝影：馬建華
甄穎珊（Carisa）
年齡：26歲
三圍：33C、24、34
身高：5呎4吋
整容位置：眼、鼻、牙、髮線及胸部整形
石詠莉（Sukie）
年齡：20歲
三圍：33C、23、35
身高：5呎6吋半
被指整容位置：割雙眼皮
吳文忻（Natalie）
年齡：32歲
三圍：32C、24、33
身高：5呎3吋
整容位置：臀部及腰部溶脂、去斑、削骨勾鼻、注骨膠原豐唇、從手臂及大腿抽脂注入額頭下巴、眉頂、下顎及眼角注射Botox（肉毒桿菌）
資料來源：《蘋果》資料室
