鏡頭前嘅阿Jim詹瑞文，幽默、鬼馬、抵死，搵佢做訪問，都預咗佢部車同佢個人一樣鬼馬；正式見面，見佢揸住部開篷MINICooperS過嚟，雖屬意料之內，但望真啲，因乜解究部車有兩條天線？原來佢戴住頂《萬世歌王》入面嘅音符帽，勁高調地遊街示眾！咁都未算誇，阿Jim仲誇下海口話揸波子、法拉利嘅人得個囂字，佢就寧願揸番部新版開篷MINI好過喎！又係鍾情MINI？乜咁似英國國寶級演員Mr.Bean？
文：許一楓
攝影：陳陶鈞
經典場面惹人笑
硬銷！音符帽全街矚目
1個月又1個月，3個月都嚟緊頭喇！由接手《同車蜜語》開始，一直都想搵阿Jim做訪問，終於等到佢現身，對於小記嚟講，真係望穿秋水，等到變化石！
知佢就嚟要開Show，預咗佢忙到爆煲，就連拍攝當日都要臨時失場推後個多小時；不過見佢趕到過嚟身水身汗，仲話其實還有工作在身，只可以將攝影時間壓縮到45分鐘，就知佢對其舞台劇《萬世歌王》製作有幾認真，估唔到「工作壓力」呢種男人之苦，對呢位笑眼看人生嘅「歌王」，都一樣Work。
約好阿Jim喺佢位於灣仔嘅Office等，一見面，我同攝記當堂笑晒嘴，事關阿Jim戴咗佢頂音符帽出嚟，呢條友仔果然夠鬼馬；佢頂帽高過車頂、又搶眼過條天線，最抵死係仲要揸住部開篷MINI，好似戴住條天線嚟揸車咁，真係全場矚目！雖知佢係為咗宣傳嚟緊嗰套棟篤Show而接受訪問，但都唔使咁HardSell啩！
癮到！陳列車照買
知阿Jim為人搞笑，就連買車都一樣咁有趣：「我好鍾意買啲古怪有趣嘅車款，同我鬼馬性格好配合，可能架車會好貴，但係只要鍾意我就會買！」半年前阿Jim想出車，原本對Smart、Roadster感覺都幾合眼緣，因為佢哋的骰、精緻又有跑味，不過最後一鎚定音，都係要呢部開篷MINICooper。
原來阿Jim對MINI一直情有獨鍾，就連買呢部Cooper時，都唔計較佢嘅出身：「其實我本身好鍾意舊款MINI，舊款嗰種Classic先係佢嘅文化，之不過我又鍾意揸開篷車，最後惟有揀Cooper啦，最好笑係我一眼見到佢就諗住科水，點知車行話未有新貨，要3個月後先有，現貨就只得呢架陳列車，我又唔係好Fussy（挑剔）嘅人，癮起上嚟唔計較咁多喇，Display照買！」
上身！變買車輔導員
難得搵嚟阿Jim，點可以咁正經同佢做訪問？所以決定考考佢，要佢再用電影《大丈夫》入面嗰位演得維肖維妙嘅「爸爸生」語氣，嚟介紹一下佢呢部車，以為佢要幾分鐘Warmup、度台詞，點知唔使5秒，即刻聽見佢突然將聲線扯高，好似有嘢上身咁話：「小姐！你想點考我先？你想點睇我呢架車先？你估我呢架車係流㗎？……如果你話佢流，咁我咪係流嘅？呢架車我第一次見到佢，顏色，橙色，唔係普通嘅橙，亦唔係姣婆橙，係靚橙！老老實實，唔係普通人可以用橙色，你睇嗰位阿叔、阿嬸可唔可以？拖住隻狗嘅菲傭可唔可以？梗係唔可以啦，但係我一襯埋去，係咪即刻變得好特別先？」
一口氣講咗咁多，見佢只係停滯咗2秒，以為大功告成，原來RapTalk繼續落：「揀車至緊要啱自己，毋須貴亦唔使崇尚名牌！……你幾百萬可以買架車，保時捷幾多錢？法拉利幾多錢？坐咗上去係咪威啲？係咪安全啲？當然唔會！個人係咪開心啲？唔係，至多咪囂啲！」
草根！做7年Van仔佬
阿Jim話佢買車係以自己開朗、搞鬼同樂觀嘅性格做出發點，但當追問佢第一架自己買嘅車嗰陣，先知係一部普通不過嘅貨Van：「因為我要幫劇團車啲團友去表演，又要載戲服同道具，所以先去考牌，順便買埋架貨Van，專心做貨Van佬囉！而呢架貨Van足足陪咗我7年，我拍拖靠佢、又用嚟車屋企人、朋友、工作、就連消夜都同佢一齊㗎！」
開頂迷你 轉眼賣晒
轉至德國BMW車廠旗下後而推出嘅新一代MINICooper，不論去到邊個Market都好受歡迎，當然香港亦唔例外，而當Cabrio開篷版喺2004年登場時，更惹來車迷一陣哄動，搞到班Fans見車就搶，隨時訂咗車之後都要等一段長時間先有車交！
講真，MINICooperCabrio改用軟篷頂後，成個Look登時Cute咗好多，而好似詹瑞文揸住嘅CooperS頂級辣版咁就更巴閉，事關引擎係一台1.6公升直4型號配Supercharger系統，單是馬力輸出已達170匹，配埋6前速Steptronic半自動波箱，燈位起步一定贏晒！
MINICooperSCabrio規格
引擎：1,598c.c.直4DOHC配Supercharger
馬力：170ps/6,000rpm
扭力：22.5kgm/4,000rpm
傳動：6前速Steptronic半自動波，前輪驅動
當年新車價：$338,800
現時二手價：約$260,000起