滙豐00及02年舊版金牛成為偽鈔集團搵食及散貨對象，廣大市民及商舖聞牛色變，各討論區自然就呢個話題議論紛紛，但睇嚟睇去，網上講嘅識別真鈔票偉論大同小異，冇乜驚喜同創見，網友對袋住張滙豐舊版金牛，回應都係清一色憂慮加無奈。
識叫識眨眼假
相反，一海之隔嘅台灣，唔知係咪飲得珍珠奶茶多，零舍多古靈精怪妙論。話說寶島嘅千元台幣鈔票，04年底都遇過一鋪偽鈔狂潮，翻睇唔少當時網民喺留言區嘅討論，真係妙語如珠。
其中《MyChat》網站05年初一篇回應，話偽鈔氾濫，央行4招防偽，講嚟講去都未必有助識別真假（同香港𠵱家差唔多）。有位網友就提出：（一）鈔票中間嘅小男孩（台央行2000年新發行千元台幣鈔票，其中一面是4個小朋友圍着指看一個地球儀圖案），若有明顯「雙眼皮」，仲「上下轉動會眨眼」；（二）鈔票背面嘅帝鴙（台灣特有雀仔），因植入超微晶片，若搖動三下貼近耳朵，可以「聽見鳥叫聲」。若你嘅鈔票有齊呢兩種特徵，百分百必屬「假鈔」!
另一網民話由於經手嘅真假銀紙太多，不少商舖甚至銀行出納員，都習慣用防偽筆測試，不過辨識率唔係好高。一向比較迷信嘅台灣，竟然流行用痱子粉（類似爽身粉）、太白粉（打芡用嘅生粉），抹喺千元台鈔正面右下角嘅「壹仟圓」字樣上，據講「1000」浮水字樣馬上現形，由於辨識率高，台南好多商家都喺收銀機旁放一包，但央行官員就不表苟同，「一人一包痱子粉，在國幣上塗塗抹抹，像甚麼話？」
港人近年飽經憂患，偽鈔集團一日未破獲，難免提心吊膽，學吓台灣民眾嘅幽默，都算係冇辦法之中嘅紓解法。