港股上個禮拜威番次，成個禮拜都升，雖然禮拜五只升兩點，但都算可以保住成個升勢，今個禮拜會點？睇嚟都會好波動，因為期指結算，好淡雙方仲會有惡鬥，結算嗰日係禮拜四，如果呢兩日港股借外圍個勢抽上或插落，隨時會喺期指帶動之下出現單邊市。
本來出現單邊市係好嘅入市機會，追揸或者追沽都會有吸引嘅獲利空間，不過，今次個市就唔係咁簡單，原因係港股𠵱家嘅成交偏細，單靠挾倉好難搞一個大升浪，就算向上破位，好可能只係假突破，又或者升多幾百點就撻番落嚟，破位高追嘅風險反而唔細。掉番轉頭睇，如果指數插落，未跌穿18600之前，都唔好睇得咁淡，亦要留意吓啲成交，如果跌到低位成交得番三四百億，大戶再插低，自己嘅風險都好大，除非佢哋有大把高位嘅空倉喺手，所以，要時不時睇實期指未平倉合約。
短期先睇住兩個裂口位，一個係2月底嘅大裂口，𠵱家恒指就係俾呢個裂口阻住上唔到，另一個裂口就係上禮拜二炒上嘅時候出現嘅，呢個係短線嘅支持位，指數喺呢兩個裂口之間上落，成交應該唔會大變，唔上唔落嘅時候最有利炒個別，對一啲概念股同二三線股最有利。
上石化C輪7611：上石化（338）上禮拜五收4.01元，股價升上4.22元之後跌番落嚟，出現咗個長身嘅「陀螺」，成交就縮咗兩日，技術調整應該已經完成，可以諗吓隻上石化C輪7611，現價43仙，槓桿率9.3倍（有效4.6倍），對沖值0.49，正股升上4.40元，7611應該有5成升幅。之前買咗另一隻上石化C輪7935嘅可以繼續揸，正股跌穿3.85元止蝕。
俊樺