近來天氣忽冷忽熱，而且落着毛毛雨又濕𣲷𣲷，搞到傷風又感冒，無啦啦瘦身。食慾不振無胃口都不特止，最慘日日勁飲白開水，淡口又無味。人生又豈可如白開水？聽醫生話少肉多菜多生果，連餸都要落生果，實行做個健康人！
記者：梁學文
攝影：陳偉強
Model：Kristy
西式煮法：靠甜味引出胃口
法國餐廳Spoon推出的菜式一向出名夠Balance，主菜、調味料、醬汁都各司其職，甚至連伴菜都同樣安守本份，配合主菜的味道。春天一到，輪到生果上陣，食得Light一點，還可以增加維他命C，大廚Simon話：「春天氣候一轉，天氣濕濕𣲷𣲷，好多人都無胃口，所以最好食得輕一啲，食生果菜就最好。一來生果有甜味易入口；二來生果食得健康，多食無妨；三來仲唔會油膩，食得多都唔會壞肚皮。」
換季之後Simon就用生果做菜，平時唔起眼的生果忽然就變成主角，除了味道好之外，賣相吸引，靚到唔捨得食。尤其是食物的顏色，就更加Sharp，Simon：「好多生果顏色好鮮艷，用來入饌，令到成個菜都好靚好Sharp。」
羊柳伴香脆亁果飯配印度香料醬汁$285
印度香料做飯，內裏加入亁果，好似提子、布冧、梨等，平衡到印度香料嗆喉的辣味，令飯更易入口。師傅用羊肩肉做羊柳，再用羊皮包住煎，羊肉味道加倍濃郁。
Kristy：生果伴羊肉好開胃，食得多都唔怕滯。
燒帶子伴青蘋果羊仔葉沙律配法國果仁醬$170
果仁醬用松子、提子亁等材料做，味道甜中帶酸。果仁醬同青蘋果沙律味道清新，令整個菜變得Fresh。
蒸法國頂級鴨肝伴香草梨沙律$285
梨沙律加入薑，令到味道變得霸道。切些少鴨肝，放上BabyHerbs同梨沙律一齊放入口，先是甜辣味，然後就是青葱味，隨之而來的就是鴨肝的濃滑口感。
特色田園沙律鮮菜生果片配茴香油醋汁$150
沙律有青瓜、蘋果、梨同蘆笋等，一共5款蔬果，師傅切得細細易入口。不可不試的是個沙律汁，特別用青瓜同茴香等材料打成，入口有重青瓜味。
Spoon（23132256）
地址：尖沙嘴梳士巴利道18號香港洲際酒店
營業時間：6:00pm-11:00pm、12nn-2:30pm（只限星期日）
中式煮法：中和燉湯膠質更爽口
冬季的仿膳，就會做滋補的中菜，不過春天一到就會改成開胃的菜式，特別改用生果做菜。中菜特別講究滋補養生，亦講究食物的味道，所以春天的菜式特別選用帶點甜甜酸酸的生果做材料，最緊要是引出胃口，避免食慾不振。用生果煮中菜特別要挑選，好似仿膳就會選用新鮮的生果，太熟或是太生的都不會用。
鮮螺頭花膠燉雪梨蘋果$188/4人用
用上燉湯的方法，可以避免材料的味道流失，所以雪梨和蘋果味特別重。雖然有花膠，不過因為有生果，中和了膠質，令燉湯入口唔太漿口。
御品鮮果糖醋魚塊$78
這道其實是糖醋魚塊的變奏版，不過師傅就改用士多啤梨、菠蘿和奇異果，取代青椒同洋葱，味道更加清新，而且顏色夠鮮艷，十足十一碟紅綠燈魚塊。
仿膳（25772018）
地址：銅鑼灣希慎道33號利園5樓
營業時間：11:30am-3:00pm、5:30pm-11:30pm
