意國時裝品牌GianfrancoFerre前晚在中環舉行火辣性感騷，台下嘉賓也鬥個你死我活，新一代人工美女甄穎珊以「缽仔糕」（nudebra）強谷假咪咪，硬膠胸效果震撼，行走波場多年的薛芷倫則以「真嘢」谷胸上陣，更揚言不知甄穎珊是誰，真箇各有千秋，可憐周麗淇則「胸前」失敗，一副扁平身材的她死撐崇尚自然美。
意大利時裝品牌GianfrancoFerre前晚在中環舉行時裝騷及派對，觸發一場蒲友「胸對胸大戰」，眾女中以新一代人工美女甄穎珊的「杜莎夫人蠟像硬膠胸」最為震撼，另外胸部時大時細、前晚因穿上胸衣款新裝令咪咪神奇「歸位」的薛芷倫，則成為二號飛彈，面對強勁對手，難挽狂瀾的周麗淇則無可選擇地登上「長平公主」寶座。
自認誇張
「比之前真係腍咗好多」
近日頻頻見報的甄穎珊，將胸部由32A僭建至33C，但因其假大胸未完全變柔軟，加上她以nudebra托胸，前晚其胸部驟看硬如膠，其實甄穎珊早前接受周刊訪問時也承認說：「因為以前打PAAG去隆胸，搞到個胸一邊大一邊細，𠵱家抽番出嚟，但係就搞到軟硬胸，唔知幾耐先會搞番好。」
昨日甄穎珊接受電話訪問時說：「我都知噚晚好誇張，我戴咗nudebra，其實唔係咁硬㗎咋，比起之前真係腍咗好多。我有敷骨膠原同搵按摩師幫我按摩胸部，我自己都有按摩，你哋覺得勁係件衫問題，件衫係幾年前去泰國時買，都未着過，嗰時唔係咁嘅身形，所以冇諗到再着番件衫效果會爭咁遠。」
問甄穎珊會否覺得自己的胸部很假？她答：「唔覺，以前我未打PAAG前仲硬，因為做得gym多，胸部變結實，我唔知究竟有幾腍先至正常？最近我有摸過幾個女仔，佢哋個個唔同，但我比起打PAAG時已經腍咗。」她更自信地說：「𠵱家我着衫比以前自信咗，我對個胸嘅形狀好滿意。」
另一方面，前晚「胸戰」中坐亞望冠的薛芷倫，行頭最為厲害，她身上的Ferre新裝價值接近94,000元。提到其胸部不夠甄穎珊震撼時，她即反問記者說：「邊個嚟㗎？我唔識佢噃。」問她是否看不起甚至輕視對方？她急忙說：「唔係呀，咁我真係唔知佢係邊個吖嘛。」會否向甄穎珊請教豐胸之道？薛芷倫說：「唔會啦！」記者讚薛芷倫身材回復豐滿，瞄頭大增時，她笑說：「個個女人都係咁㗎啦，肥咗咪長肉囉。」會否嘗試吃近日內地流傳的胎盤餃子保養身材？她耍手說：「我係靠多做treatment同運動，唔會隨便試第啲嘢，打羊胎素嗰啲一定唔會。」
捍衞平胸
「我怕太大負荷唔到㖭」
至於「長平公主」周麗淇被問到胸部是Acup還是Bcup時，她說：「呢個問題咁核突我唔會答，我冇介意過自己嘅身材，自然咪OK囉，更加唔會同人作比較。」問她閒時有否向胞姊周汶錡請教健美之道？她說：「總之唔會同人作比較啦，我唔需要尋求隆胸整形，加上我腰骨唔係咁好，長期要睇醫生，我怕太大負荷唔到㖭。」周汶錡早前曾與蕭定一爆發整容罵戰，難怪周麗淇會單打甄穎珊為胞姊出頭。
對於薛芷倫和周麗淇句句有骨的說話，甄穎珊昨日只說：「我係新人，由零開始，薛芷倫係名人，唔識我正常。每一個人都有自己嘅生存之道，有人鍾意自己，有人唔鍾意，我冇乜所謂。」
採訪：吳天慧 攝影：陳順禎
