【本報訊】涉及警員徐步高的尖沙嘴槍擊案，死因研訊將焦點轉向研究徐步高的生活及財政狀況。徐生前一名前警員好友，昨在庭上大爆已婚的徐經常與他穿梭中港尋歡，去深圳消遣時「起雙飛」。而一向節儉的徐，竟瞞着妻子在他面前掏出7.5萬元現鈔大注賭波，終博得21萬元彩金。 記者：蔡曉楓、梁偉強
現已離開警隊的李藝（35歲），93年入職當警員，現已離職，他供稱94年在機動部隊初識徐步高，翌年兩人同駐守機場，偶有見面。99年在警察駕駛學校遇上，徐學駛機動車輛，李則學騎電單車，兩人逐漸成為老友，他稱徐做「老虎狗」或「阿高」，每周一、兩次相約到東涌及警察遊樂會跑步，一起參加馬拉松及毅行者。
現年35歲的徐步高，97年與妻子李寶玲結婚，李藝昨大爆他與徐曾穿梭中港結伴嫖妓。李說，自99年兩人除了結伴跑步，亦會一同往深圳沙咀消遣，「去卡拉OK搵吓女仔，飲吓嘢，跟住各自帶女仔入房玩，佢（徐步高）有時帶兩個，之後吹水話好玩。」李指北上次數不定，有時一個月兩次，或幾個月才去一次，「二、三百蚊一次，開房畀多五十蚊，連車費食飯，一個人都唔超過五百蚊。」
每周光顧花園街架步
北上尋歡同時，李藝與徐步高在港亦有「娛樂」節目，「我哋去花園街嘅『一夜情』指壓中心，起初一個月去兩、三次，佢平均一星期一次，我有需要咪去囉，到有比賽時就去少啲。」每次消費250至260元，李指自己05年6月結婚後已鮮有踏足此地。
花園街「一夜情」指壓中心一名職員昨向記者稱，徐步高「幫襯」了兩年，是一名熟客。「佢從來冇話自己係差人，但係我哋一睇就知佢係差佬啦。」職員稱，徐步高常一個人來，間中亦會與友人同來，去年槍擊案前一個月亦曾來過。
李藝婚後與徐步高關係逐漸疏離，徐開始轉玩滑翔傘，06年2月，即徐步高身亡前一個月，徐帶李到深圳常平入住匯信酒店，觀賞他玩滑翔傘，但天雨影響未能一睹其滑翔風采，兩人轉戰桑拿按摩中心玩樂。
從未見過徐步高搓麻雀的李藝，在01年底麗城恒生銀行劫案後，指徐曾兩次主動提出投注賭波。02年6月世界盃巴西對德國終極決戰前夕（巴西1.4倍；德國2.8倍），「佢問我巴西對德國邊隊贏，託我搵人幫佢買波，佢買5萬，我話人哋受唔起，叫佢去澳門合法投注。」李不知徐最後有否下注，只知巴西勝出。
賭波「唔想畀老婆知」
04年8月7日早上，兩人相約跑步，徐突然問他認為中國對日本（中國2.35倍；日本2.8倍）那隊勝算較高，「我話梗係日本，佢話日本同中國有仇，但係中國差啲。」只見徐即時在背囊取出一大叠千元及五百元現金，合共75,000元，李合資5,000元，兩人到東涌的馬會投注站下注日本勝出，晚上到徐家觀戰，「後嚟佢老婆喺屋企，佢唔想畀老婆知佢賭波，我哋去咗警署娛樂室度睇」，當晚兩人獲派彩22萬4千元，徐分得21萬元，但是他身穿短褲，「咁大嚿錢唔方便拎番屋企」，兩日後李轉賬款項到徐戶口。
同年9月11日，兩名老友結伴到新西蘭自助旅遊，機票每人4,000元，徐兌換約值25,000港元的紐幣作使費，此行計劃了數月。而兩人最後見面是在06年3月10日，李初次帶妻子與徐的女兒在青衣見面。槍擊案發生前一天早上，李致電徐相約跑步，但其手機已接不通。
徐母：男人去玩正常
昨午徐母聽到李藝提及兒子又嫖又賭的往事時面色一沉，散庭後，她稱兒子曾帶李藝回家睇波及吃飯，但不知兒子去深圳尋歡，她表示「冇唔開心，人都死咗，我𠵱家聽乜嘢都唔會嬲。」至於會否擔心媳婦不快，她只說：「但凡女人聽到自己丈夫去玩都會唔開心，不過男人去玩亦係正常。」
案件編號：CCDI515/01,2261/01&373-4/06