親情無價，無分種族。印裔演員喬寶寶的3歲幼子GillArvinSingh，1歲時驗出脊椎神經線有毛病，不良於行，不過這不幸卻拉近兩父子的距離。喬寶寶為了訓練Arvin成為硬漢子，即使看到他跌倒受傷，仍要忍痛讓Arvin堅強面對。只要看他們走幾步路，已見證父愛的偉大。
前年參加無綫節目《殘酷一叮》後加入娛樂圈的印裔演員喬寶寶，在鏡頭前曾扮演好好先生亨利，鏡頭後亦是個樂觀積極的好爸爸。現年36歲的喬寶寶，育有兩名兒子，身為一家之主的他，十分重視親子關係，不用開工時，他必定會抽時間陪伴家人，令四口之家樂也融融。
1歲發病成日跌
喬寶寶日前趁休息，到佐敦接就讀幼稚園的幼子Arvin放學，然後帶他到九龍公園嬉戲。Arvin輪廓分明，束着長辮，不知就裏可能誤會他是女生，喬寶寶說：「印度傳統小朋友一出世係唔會剪頭髮，直到佢哋開口話想剪，遲啲Arvin唔剪頭髮就會包頭巾。我同佢出街，佢成日俾人認錯係女仔。」
Arvin精靈活潑，不過其脊椎神經線有毛病，步行時腳板不能緊貼地面，只能靠腳尖走路，所以很容易跌倒，喬寶寶說：「喺Arvin1歲時，我哋發現佢成日跌倒，於是帶佢睇醫生，後來check到佢脊椎神經線有事。最初聽到呢個消息，我哋真係好傷心，醫生安慰我哋話做物理治療會改善情況，嚟緊呢幾年係關鍵，𠵱家佢一星期要做兩次（物理治療），佢算好乖。」
到達公園時，Arvin蹦蹦跳跳，可是他一急步便跌倒，喬寶寶縱然心如刀割，也任由Arvin跌完再爬起身，他樂觀地說：「佢係strongman，好少喊，少少苦楚等於激勵。」樂此不疲的Arvin又攀上梯級玩滑梯，看到兒子堅強的一面，喬寶寶滿心安慰：「唔係太危險，我會由得佢去試，不過有次我睇漏眼，佢就爬上鋼架，因為落唔到嚟，所以猛叫我，當時真係嚇咗我一跳，佢就一啲都唔驚。」
重溝通抗拒體罰
喬寶寶認為教子最重要是溝通，體罰已不合時宜，他說：「坦白講，我對兩個仔冇乜期望，只希望佢哋開開心心咁健康成長，做一個對社會有貢獻嘅人，做邊行都冇所謂。」Arvin試過把飲料打翻在喬寶寶的劇本上，盛怒的他大喝一聲，Arvin即乖乖扭耳仔道歉，試問喬寶寶又怎捨得打他？
兩父子耍樂後，便到附近的麥當勞醫肚，當喬寶寶要Arvin請吃薯條時，他作狀整蠱父親，其後又餵他吃薯條，洋溢一片溫馨氣氛。道別時，Arvin又給小記飛吻，令小記百感交集。
撰文：比華利
攝影：仇志德
本欄逢周六刊出
