回歸是一場風暴，迅雷不及掩耳之間，捲走了無數中產家庭的家當，也沖散了無數中產家庭的幸福生活。暴風雨的前夕，Silvia是西貢複式洋房的少奶奶，住洋樓揸靚車；風暴降臨，少奶奶一下子被吹到平民區，住村屋踩單車。美滿豐盛的中產家庭，至今還沒有復元過來。 記者：蔡元貴
回歸前，丈夫由打工仔晉身老闆階級，96年買豪宅，97前誕下一女一子，圓了成家立室的中產家庭好夢：「丈夫嘅生意做到好大，我哋一家四口，550萬喺西貢買咗套複式洋房。香港人思想，有層樓好緊要。」他們出入以寶馬房車代步，有工人使喚，兩名子女入讀國際學校，家庭開支每月閒閒哋十零萬元，也綽綽有餘。
複式洋房被迫斷供
Silvia的丈夫經營製衣生意，主權移交後首年，亞洲金融風暴席捲香港，丈夫也被捲進水深火熱的漩渦當中，賠上本來用作供樓的錢，加上董建華推出八萬五房屋政策，樓市一沉不振，使得Silvia一家無力翻身：「我哋層樓被迫斷供、拍賣，如果唔係八萬五，賣咗層樓都可以東山再起，但係樓價大跌，由550萬跌到275萬。」單位賣得的款項資不抵債，他們仍欠銀行120萬元，須分期還錢，至今尚未繳清。
「香港七、八十年代都有金融風暴，中產都能夠捱過，因為有物業按揭，可以套現翻身。但係回歸後加上八萬五，我哋呢班人就咁冇咗。」Silvia「冇咗」的，卻不僅是一幢豪華洋房，因為種種原因，她與夫婿的多年感情也同在金融風暴中捲走了。執達吏迫遷那天，Silvia隻身帶着年幼的子女離開，全副身家，就只餘三個紅白藍膠袋。
「我個仔當年只有五歲，臨搬走嗰日，囝囝問我點解會冇咗間屋，之後佢仲好懷念嗰度，叫我帶佢返去睇吓。」Silvia說，回歸前對香港前景很樂觀，怎樣也想不到有這麼一天：「英國人做好晒啲基建，訓練好一班優秀公務員，但係想唔到八萬五殺傷力咁大。」
告別豪宅、告別丈夫，Silvia展開吉卜賽式的流浪生活：「我冇晒錢，連租屋按金都唔夠，要投靠親戚，但寄人籬下，仔女俾人歧視，住咗一陣又要搬。」三母子輾轉搬到浸會大學的國際賓館，一星期接着一星期的熬下去，直至在西貢找到房子租住為止。
解決了住屋問題，又輪到子女的求學問題。她當時不能再應付國際學校的開支，子女須轉讀平民小學：「我個仔去搵學校，校方話我冇固定住址，唔肯收我個仔。」最終還是靠人事，Silvia獲得西貢一家官立學校的校董幫忙，兒女才能安頓下來。
雙失母親曾想自殺
那年頭，破產數字跟燒炭自殺的數字同創新高。失去物業失去丈夫的雙失母親Silvia幾度想過自殺：「當時好興燒炭，搬入西貢之後，我有幾次想過自殺，想過攬住仔女一齊死。好在我信佛，諗起殺生罪孽太重，先至打消燒炭念頭，堅強面對。」
數年後，三母子再由西貢搬入更加偏遠的坪洲。由浮華到慳家，Silvia電話簿上的朋友，至今還有交往的，不到五人，由中產變成升斗市民：「好在我出身草根階層，細個都慣咗捱窮，而且我信佛，唔食肉，可以好慳好慳。」Silvia兒時家境並不富裕，養成節儉的習慣，從不趨慕名牌，跌下來也捱得住痛。
對很多中產家庭來說，回歸等於浩劫。Silvia身邊也有同病相憐的朋友：「我認識一位媽咪，做成衣生意，家住九龍高尚住宅區，金融風暴一個浪冚過來，即刻支持唔住，被迫賣咗層樓。但係佢為咗子女繼續可以讀名校，死慳死抵都要租番同區嘅樓住，重隱瞞住啲仔女。我相信，當時仲有好多呢類個案。」
回歸草根，回歸平淡，Silvia的最大感觸，並非人財兩失，而是10年來香港的人情冷暖：「我發覺，金融風暴之後，呢個社會人與人之間少咗一份和諧、一份關懷，無論有錢冇錢嘅人，對身邊嘅事都漠不關心。香港人好似冇咗份安全感，越來越緊張鞏固自己利益。」
10年了，驀然回首，是誰偷走了中產家庭的安全感？