昨日篇稿交出後，碰啱披圖梁來電，於是乘機向佢講有讀者希望澤田研二能夠來港演唱。披圖立即大吐苦水：「你真係睇得起我，我辦一場四月十五日ONJ紅館演唱會，已經出盡食奶力，邊度敢搞澤田研二演唱會吖。ONJ之後，點都要唞一唞，計清楚條數先。」
左丁山問佢：「西城秀樹又如何？」披圖話：「西城秀樹好多年前喺伊館演唱，我有份搞嘅。當時張國榮仲未好紅，要求到後台近距離觀察西城秀樹嘅一舉一動，從中偷師。西城嗰場演唱會，首創四面舞台，讓本港演藝界耳目為之一新，推動香港演唱會嘅進步。西城秀樹好注意保護聲線，絕對不讓喉嚨着涼，幾時都戴住頸巾護頸。」
講嚟講去，都未敢話請西城秀樹或澤田研二來港，再追問，披圖話：「研究吓先啦，如果你肯打本或者有人打本，咁就另計。」講笑咩，不如搵一啲已經發大達嘅澤田或西城歌迷贊助啦。香港辦演唱會好現實，宣傳費、製作費、歌星演出費（包括機票酒店）及隨行人員費，加加埋埋係一個大數目。紅館租金達票房收入兩成，條數好襟計，精明如披圖，只能見步行步，做完ONJ先至敢諗下一位。
關於保護聲線，左丁山記起幾年前聽港台訪問蔡琴（你識唔識？），蔡琴話佢從來唔食辛辣食物，唔飲凍水（任何凍飲品都唔飲），以免聲音受損，佢與西城秀樹都好專業，識得保護自己最重要嘅資產。關於呢一點，左丁山有時見到一啲細路打完波，一身汗，返回場邊坐低之後，就話好熱好熱，要剝衫。呢樣好唔妥。我哋睇NBA籃球直播，位位球星，例如拿殊（SteveNash）一走返場邊坐低，佢會立即穿上球衣外套保暖，避免肌肉着涼，引致受傷，呢啲就係專業精神嘞。韋八少話NBA球星位位接受電視台訪問之時，總會說話得體，口才唔錯，相反我哋香港啲球星或英超聯大牌（如碧咸）就會講到一嚿嚿，為何如此，大家不妨諗吓。