時間：97年12月
地點：銅鑼灣中西醫學抗癌協會
人物：林蛟、黃夏蕙
經過：Rosemary同衞蘭嘅前男友Gordon，因為𡁻完唱而被封一代賤男，其實「𡁻完唱」呢家嘢，林蛟同黃夏蕙都試過。呢對活寶貝97年鬧交鬧到互爆性史，幾乎連肚皮都挖埋出嚟畀人睇，真係唔到你唔服。
97年12月11日，梅艷芳媽媽覃美金喺自己銅鑼灣間中西醫學抗癌協會度開記者會，公開指摘黃夏蕙借抗癌協會名義呃錢，嗰日梅媽搵埋林蛟出嚟數臭黃夏蕙，林蛟就大爆佢同黃夏蕙幾十年前嘅情史，話當年做主角嗰陣，黃夏蕙做緊特約，係黃夏蕙主動走埋佢度話要服侍佢，又爆當年同黃夏蕙有過親密關係。
林蛟愈爆愈興奮，第日佢接受傳媒訪問嗰陣，仲大爆黃夏蕙性慾強，游游吓水都要嚟，一向鍾意出風頭嘅黃夏蕙當然不甘示弱，嘲笑林蛟「邊有咁勁」，又話對方床上功夫畀60分都嫌多，兩個加埋百幾歲嘅老人家完全唔顧體面互數風流賬，當年喺娛樂圈真係轟動一時。
不過，娛樂圈係冇永遠嘅敵人，呢對活寶貝鬧完之後，又喺2000年2月18日林蛟徒弟嘅壽宴度握手言和，呢件曾經令全港市民笑破肚皮嘅陳年性史，至此告一段落。
本欄逢周一至周六刊出