上星期日嘅打吡大賽非常刺激，「俊歡騰」輸個馬鼻畀「活力金剛」，欠些少運氣，無話可說，每年打吡之吸引力，就係來自呢啲激烈爭勝嘅場面。
今日跑馬當然冇咁精彩啦，但亦有兩場盃賽，一場係仁愛堂盃（第九場），一場係中大校友會聯會盃（第八場）。港大校友挑戰盃已經喺一月二十號舉行咗，當日香港大學啲校長、副校長、院長（包括林兆鑫）全部出席，場面墟冚，睇吓今日中大校友會聯會盃有冇咁熱鬧？港大人係做得玩得嘅。中大人就多數識做唔識玩，搞賽馬可能冇港大咁巴閉。
中大校友會聯會盃由第三班馬跑一千米，睇落許晉亨公子隻「醉激」極有機會，上次「醉激」贏馬（二月二十五日），居然有唔少娛樂版記者到場，以為可以影到許公子與李嘉欣嘅拉頭馬相，點知許公子冇到場，由父親許世勳與母親代為捧盃，令班記者大失所望。今日又有機會捧盃噃，記者大概又會心思思到場希望影到李小姐與許公子手拖手。據馬王輝講，「醉激」未必贏得晒，新馬「好有勝」與「驊中龍」未見底，舊馬「好聲氣」亦有威脅力。
馬主Ｈ、肥仔豪等食飯傾賽馬之時，侍應居然問攞貼士，點敢講呀，練馬師親口講貼士都唔中啦，何況我哋。灣仔一間餐廳有一位常客，就係圈中好有名氣嘅外籍人士，廚師見佢幫襯得多，開口問貼士，結果輸足一個月。輸到怕咯，廚師唔敢行出廚房見外籍人。點知有一次，外籍人埋單後特別走入廚房搵廚師講：「聽日呢隻馬真係好有機會呢，你真係要留意吓！」廚師見對方咁有誠意，第二日大大地賭一鋪，唉吔吔，以後一個月幾乎要借糧。
圈中人未必一定講大話，因為賽馬有好多意外嘅啫，一位大馬主經常問練馬師：「我隻馬今次有冇機會？」練馬師講過一次：「機會好好！」到咗賽馬日，大馬主帶埋成班（佢嘅工廠所在地）書記加乜長物長到沙圈，話明等啲書記拉番場頭馬威吓。唉吔，隻馬俾其他馬撞咗一嘢，腳法亂晒，落第而回，大馬主面黑黑，嚇到練馬師唔敢行埋去，以後大馬主問親，練馬師都只敢話：「即管博吓啦，未必贏得。」