戇豆先生路雲艾堅遜（RowanAtkinson）繼上集《戇豆先生》（Bean）大鬧美國後，今次喺《戇豆放大假》（Mr.Bean'sHoliday）繼續發揮其無厘頭本色。飛到法國康城搞搞震嘅佢，唔止誤打誤撞被以為係兒童綁匪，更遇上佢人生第一個女人，搞出唔少「大頭佛」，務求令觀眾嘻嘻哈哈歡度復活節。 撰文：戶川淳
對人歡笑背人愁，好多諧星都係咁，畀過好多歡樂大家嘅戇豆先生都唔例外。觀眾記得佢係Mr.Bean多過佢真名嘅英國諧星路雲艾堅遜，年前因為套《特務戇J》（JohnnyEnglish）唔收得，搞到患咗抑鬱症，為咗事業，路雲終於又要食番老本，再做戇豆。下周四（4月5日）正式在本地上映嘅《戇豆先生》電影版續集《戇豆放大假》，絕對係佢盡地一鋪之作，路雲仲揚言今次係佢最後一次扮戇豆㖭！
玩埋環法單車賽
套片繼續玩儍人有儍福，戇豆今次無啦啦贏得旅遊大獎，由英倫飛到花都，玩足一星期。佢由落機開始已有唔少搞笑出位行徑，好似買零食嗰陣竟然可以將領呔同銀紙一齊揳入部機。咁啱當地舉行康城影展，戇豆本來打算帶住佢部全新嘅DV去康城周圍拍，但途中佢又失驚無神走咗去參加環法單車賽，着住招牌老西同人「鍊車」，仲誤打誤撞被以為係綁架10歲細路史提芬嘅綁匪。
出手助暗星上位
戇豆同史提芬雖然雞同鴨講，但係又齊齊開心遊巴黎，當佢發現自己變成全城通緝犯後，為免喺牢獄度過自己嘅開心假期，戇豆就試圖避開所有人嘅耳目，將史提芬送返佢爸爸身邊。
其間戇豆遇上由愛瑪狄歌絲（EmmaDeCaunes）扮演嘅荷李活暗星莎賓，戇豆唔止希望可以幫靚女成名，仲嚟招「戇豆救美」。
據聞今次套片無論係故事抑或形式節奏方面都唔會好似上集咁美式，反而係接近路雲一直希望嘅歐陸式電影。
爆笑場面要昅實
戇豆先生一向儍儍戇戇，做乜都論論盡盡，引發笑話連篇，喺《戇豆放大假》入面都有三大搞笑場面，觀眾要打醒精神，唔好錯過呢幾個笑位。