學嘢永遠都係睇就易，做就難，眼見首次來港表演嘅攀爬單車8屆世界冠軍KennyBelaey，連人帶車喺4米高處跳落嚟，完Show之後就請教另一高手——全國冠軍JJLee，教我試踩攀爬單車。騎到上車先知架單車無Seat位！連起步都唔識，笑死人。JJ話叫我唔好心急，佢玩咗10年都仲有大把嘢學，因為啱啱同Kenny較量過，對手唔單只技術高，而且體能好、有膽識、轉數快，甘拜下風咁話。究竟Kenny贏咗啲乜？即睇。
記者︰劉昱蘭
攝影︰周旭文
中國冠軍vs世界冠軍
攀爬單車最精采嘅地方，就係睇住選手人車合一，遇到大障礙物輕盈跳起，一躍而過；細微空隙話到就到，又狠又準。所以今次比咗4關考吓佢哋，全面鬥技術又鬥膽識。
平手：熱身賽——定點跳
首回合先試兩個轆着地立定跳起，除咗講技巧之外，最考腳力同手力夾起架單車。雖然左邊JJ嘅前轆睇落離地遠啲，但經小記零距離觀察，兩架車嘅Level其實不相伯仲，同埋JJ架車係鈦金屬輕身啲啲，第一回合打成平手。
平手：障礙賽——跨欄
玩攀爬單車當然要俾啲障礙佢哋表演，單車跳起，轆喺欄杆上彈咗數秒再落地。兩位上落嘅動作都亁淨瀟灑，而且好似輕輕力就上咗去咁，兩個都好有型。
Kenny勝！：難度位——繩前跨跳
單車先在斑馬線位起步，衝至繩前再跨過去，同時要處理衝力同埋跳起嘅力，嗰種力點樣轉移得宜最講技巧。其實跳過去就唔難嘅，但Kenny過到之餘，後轆再離繩半個轆位，而JJ就僅僅過到，呢個回合睇嚟Kenny稍勝一籌。
平手：鬥膽識——海邊爬石
再試你哋夠唔夠膽大，海邊咁玩其實係佢兩位提議，石頭凹凸不平嚇死人。結果大家都如履平地，仲引嚟金紫荊廣場一眾同胞駐足歡呼，贏晒！
總結：4個回合總計，其實JJ都只係輸咗半個轆位畀Kenny啫。
彩虹戰衣香港現身
彩虹戰衣即係代表着單車項目嘅世界冠軍，喺來自比利時嘅Kenny身上着咗8年！Kenny唔單只係世界冠軍，仲係喺1分鐘之內，以攀爬單車180度轉圈嘅健力士世界紀錄保持者，轉到31個圈，即係平均每2秒就要轉180度！喺香港玩攀爬單車嘅人唔多，今日仲可以親眼欣賞到世界級高手嘅表演，凌空飛越障礙物、180度空中自轉、跨越人身……一眾高手都讚精采。
Kenny勁喺邊？
Kenny︰「為冠軍努力不只為了銜頭」
Kenny：「好Enjoy比賽，比賽可以令我更上一層，當我同對手同分決勝負嘅時候，係衝破自己極限嘅最佳時刻。贏嘅感覺興奮，但最鍾意都係以冠軍銜頭周圍出Show，令攀爬單車更多人玩。」佢話最深刻係返佢家鄉，20,000人一齊睇佢表演，嗰一刻只係最叻嘅人先有機會享受。「8屆冠軍係由好勝心驅使，但好勝，並唔係純粹為咗想贏咁簡單。」
KennyBelaey巡迴表演
RedBullLocalHeroTour詳情
香港站︰3月24日（星期六）
時間︰11:00am 地點︰西貢繽紛樂園
時間︰3:00pm 地點︰將軍澳中心商場
澳門站︰3月25日（星期日）
時間︰3:00pm 地點︰澳門旅遊塔
時間︰11:00pm 地點︰BEX（澳門冼星海大馬路文化中心）
想玩？即睇入門裝備
想學Kenny玩攀爬單車，最緊要係識得做足保護措施，唔係陣間未學精就跌到周身傷，點繼續玩落去呀？
售賣點——跳車站（23471257）
地址︰深水埗元州街273-279號泰盛工業大廈1樓B室