做人父母甚艱難，黃家強兒子本月10日出世，做了十幾日老竇的家強便猛呻眼瞓，因為要幫手餵奶掃風，每天睡三、四小時便要起床，不過他仍樂此不疲，還打算五年內再生一個，讓兒子有個伴。
香港貿易發展局連日來在會展舉行「香港音樂匯展」活動，容祖兒前晚與詹瑞文及許冠文出席其中的「香港流行演藝文化的創意及動力展剪綵儀式」，黃家強則以搖滾樂代表身份出席「冠軍流行樂隊選拔賽2007」。
狂呻唔夠瞓
家強大談樂隊成功之道，他說：「樂隊音樂要有風格又有市場，咁先係必殺技，夾band唔係一個人玩，係一班人玩，成功要互相了解，互相忍讓，做到無私同民主先得。」家強又暢談初為人父的湊仔苦樂，他說：「好眼瞓呀，個仔出世後日日要三、四個鐘起一次身，餵奶同換片，我老婆餵奶我掃風囉，我之前都陪過老婆上育嬰課㗎，但上咗一堂就冇上，都冇乜用，反而護士教嘅仲有用。」
家強謂幸好其子不愛扭計，他又請了陪月白天來幫忙，已經算幫輕很多。問到其子長得像誰，家強說：「似我囉，對眼好似我。」他已為兒子取名，但太太不想公開。家強又謂打算五年內再生：「唔係我想要多個，而係想BB有個伴。貴有貴養，平有平養，我呢啲中價，餵人奶咋嘛，幾慳。」家強謂最近工作忙，稍後會送禮物給太太慰勞。
籌辦喜劇節
另外，祖兒提供唱片給大會作展覽，原本她想提供演唱會歌衫，但大會表示今年先將焦點放在梅艷芳的歌衫上，祖兒的要留待以後再算，祖兒說：「希望香港有個博物館，可以長放歌手有代表性嘅物件同歌衫。」詹瑞文則透露將於下月19日開始舉辦喜劇節，他說：「我會請許冠文做talkshow，仲有張錦程同農夫參加，為期三星期，有好多唔同節目㗎。」
採訪：駱華齡
攝影：林德雄
