我求大俠兩日前報道過有關國際米蘭前鋒阿祖安奴（阿祖）夜店「開拖」事件，再三收風後，原來阿祖當時係見義勇為，無做錯，反而AC米蘭球星「肥哨」朗拿度嘅縮骨行為，就要公開聲討一吓！
當晚阿祖同籃球員路蘭度「隻揪」，係路見不平拔刀相助。事緣路蘭度用語言同動作性騷擾意大利一著名電視女主持人諾拉，隔籬枱同朗拿度、恩沙基、波里路等AC球員飲緊酒嘅阿祖，隨即決定上前抱打不平。
「你唔好再埋個女仔度！」阿祖大喝，不過朗拿度、恩沙基等人見對方身高兩米零幾，於是望東望西扮睇唔到。聽個女仔講，之後兩個人各自行開，打交嘅事就唔清楚。阿祖今次代女出頭絕對係大丈夫行為，抵讚！
相反，當晚同阿祖一齊摸酒杯底嘅恩沙基、朗拿度等人就抵鬧喇！尤其係事後碌大眼講大話，聲稱自己當晚唔在場、亦冇嘗試阻止兩人打交嘅朗拿度，呢種縮骨、目睹不平事突然變盲嘅行為，無疑係賤男之中嘅極品！
諾拉事後同記者講：「我好感激阿祖，因為當時冇人肯幫手，我見到朗拿度都喺度，但佢冇做任何嘢！」經過呢件事後，朗拿度短期內都唔敢去蒲喇！唔怕俾人笑咩？