第一眼望見標致107已經覺得佢好似一條魚，打開咗嘅兩邊車門亦似足魚鰭。剛剛實試熱辣到港嘅107，小記一坐上車、喺馬路上左兜右兜穿穿插插之後，呢種感覺就更加強烈，皆因佢嘅靈活性同和諧嘅速度感，真係好似一條海中嘅小飛魚！
記者：周達之
攝影：陳盛臣
動作靈活 又夠穩定
全新標致107的確車如其名——標致可愛，皆因佢車頭有個大大嘅笑臉嘴巴，頭燈又似對大眼睛，精靈得意，望落去真係好似《海底奇兵》裏面嗰條Mo仔！揸住佢喺北角左穿右插，感覺到佢轉向靈活，呢點或者同佢可以分別控制左右前輪轉向角度嘅CorneringStabilityControl（彎路穩定裝置）有關。
一般細車喺高速行車時都會有唔穩定嘅通病，不過小記曾試過喺路路暢通嘅東廊，將107踩到70km/h，發覺部車一啲都無飄嘅感覺，行車十分穩定，可見廠方喺佢車身設計同懸掛方面都有落過功夫。
操控簡易亦慳油
標致107嘅波箱比較特別，表面上佢係自動波，但其實骨子裏所採用嘅係棍波用嘅傳動系統，即係話佢唔係用液態離合器，而係用棍波車用開、以磨擦片接合嘅離合器嚟傳送動力，而極力子嘅控制就交由電腦負責，用家完全唔使煩惱。呢個設計既有自動波嘅簡易操作，亦有棍波嘅慳油特性。既然107係Sell簡易操控兼慳油，呢個設計簡直就係最完美嘅配搭。
小記實際試揸107之後，覺得佢喺唔踩油門及迫力嘅情況之下，緩步向前嘅速度比一般自動波車更慢，直情好似蟻躝咁款，呢種特性喺遇上大塞車嗰陣就更加大派用場，雖然唔講得話佢可以將塞車變成樂趣，但起碼連踩迫力嘅力都可以慳唔少，感覺上賺咗！
但喺倒車方面，107喺入咗後波、唔踩油門同迫力嘅情況底下，反而會有向前緩慢移動嘅傾向，呢一點同一般自動波車好唔同，小記覺得呢個特性有啲反邏輯，要花少少時間適應。
無痛泊位實錄
對於不擅泊位嘅人嚟講，107短頭兼無尾嘅車身簡直就係佢哋嘅救星，小記親身用佢嚟試泊一次，加埋今日駕駛學院謝老師嗰招「望C柱泊S位」，三扒兩撥就搞掂，完全無難度。
玩具內櫳好搞笑
車廂內櫳方面，成個感覺就係好「玩具」Feel，各個部份嘅外形都係圓DumDum咁，而且仲用咗唔少塑膠材料。另外，為咗力求簡約，107減省咗好多電動裝置，例如左右兩邊倒後鏡就唔係電動操作，需要手動調校。唔知點解，小記喺調校左右後鏡嗰陣忍唔住笑咗出嚟，不過呢種其實只係覺得呢個設計同107襯到絕嗰種會心微笑，絕無嘲笑成份。
正正因為佢簡約，所以重量可以輕到只有835kg，又正正因為佢夠輕，所以即使佢用副1公升、馬力68匹嘅引擎都仍然夠力，試車嗰日載住3個大男人上斜都無話氣喘。
唔滿意嘅係佢嘅軚盤設計，因為軚盤由中央到兩邊部份都係喇叭按鈕，一個唔覺意手腕部份就會㩒到個喇叭，小記試車嗰日就唔覺意㩒到幾次。
抵讚：
操控靈活易掌握，高速行車亦十分穩定。除外型有趣外，慳油特色亦較為實際。
要彈：
內櫳設備較弱，軚盤設計令人容易㩒錯喇叭，入後波會向前嘅特性有啲奇怪。
Peugeot107規格
引擎：996c.c.雙頂凸輪軸12氣閥VVT
馬力：68hp/6,000rpm
扭力：93Nm/3,600rpm
傳動：5前速半自動波
尺碼：3,430×1,630×1,470mm
軸距：2,340mm
售價：$139,900
車輛提供：法國汽車（31181828）