要講特色街道，香港有好多，喜帖街、雀仔街、古董街……但要講最潮嘅一條特色街道，就無邊個唔識波鞋街。呢條香港咁有特色嘅街道，好可能因為政府嘅重建計劃而消失。現時波鞋街主要由四大集團壟斷，貨路各有特色，如果想喺呢條街買波鞋，就要先知道行貨水貨舖嘅分布，和四大集團嘅主打貨色。
記者：葉雪芯、陸俊雄
攝影：林栢鈞、何家亮
全條街67間鞋舖
波鞋街，泛指奶路臣街和花園街一帶，花園街店舖主打performance鞋款，而奶路臣街則以賣水貨、特別版波鞋為主。由七、八十年代嘅十多間波鞋舖，發展到現在67間波鞋店舖，堪稱香港鞋庫。波鞋街嘅吸引處除齊款齊碼外，價錢仲要比外面便宜，即使斷晒貨嘅版本，分分鐘都可以喺呢度搵到。唔好以為整條波鞋街有60多間舖就有幾十個老細，其實現在好多店舖主要由四大龍頭瓜分，而大部份龍頭大佬都為人低調，而且各自售賣不同主打品牌和貨色，是以一向維持良性競爭關係。
最近由於市區重建局落實K28重建項目，將奶路臣街和花園街樓宇連地舖清拆，當中涉及16間波鞋店舖，即約四分一條波鞋街受影響。如果真的就官方建議，將波鞋街的店舖統統搬到商場內，呢條香港特色街道將從此消失。
第一大龍頭 允記
說允記是波鞋街第一大龍頭，應該無人異議，因為單在波鞋街，佢已佔有13間店舖，是數目最多、最系統化嘅波鞋店集團。允記最初是在灣仔售賣運動用品，到七十年代才開始進駐奶路臣街，帶頭令波鞋街漸漸成形。
允記旗下店舖包括WANKEE、NEWYOUTH等等，主打品牌有NIKE、adidas，還有代理嘅品牌專門店如K-Swiss、Columbia。對於重建計劃，允記集團經理文先生話：「我哋梗係唔想拆舖頭，𠵱家諗緊辦法，或者同樓上業主商討，睇睇有乜雙贏方案……波鞋街龍頭？唔敢當，只係舖頭數目最多，佔嘅marketshare多啲啫！」
Sales推介
勢力範圍
店舖數目：13間
（查詢：23923368）
30年老商號 富豪Fulvo
Fulvo可以算得上是波鞋街第二大龍頭，旗下店舖共有10間。老闆彭生彭太做咗呢行三十幾年，80年代正式登陸波鞋街，是歷史最悠久的店舖之一。據聞，Fulvo呢個名，係以兒子名字命名，旗下較出名店舖包括Livo、Jivo、Apex等，波鞋迷無人不識，主要賣adidas、Converse等。不過波鞋王的店舖並不是間間有名堂，有啲只係玩黑白色tone嘅adidas裝修，就算無舖名都已經夠「照」。
對於重建計劃中兩間店舖受影響，老闆彭生歎：「唔擔心得咁多，相信熟客會識門路搵番我哋。」
Sales推介
勢力範圍
店舖數目：9間
（查詢：23853311）