星期一中午搭𨋢落樓，𨋢內有一名西婦，揸住部「黑莓」猛咁傾緊，𨋢門一閂，通訊中斷，西婦面有𤷪意，到咗樓下開𨋢，立即又襟掣，再傾過。
去到星期一飯堂，追數王揸住部「黑莓」又睇又講，甚為繁忙，做佢呢行，電話緊要過天，唔係點樣搵人追數呀，佢一路食飯一路睇「黑莓」，可以理解。追數王同我哋講：「揸住黑莓，會揸到上癮，無此不歡，無此過唔到日辰。」佢講一個加拿大故事：一位行政人員日日睇好多電郵，突然間喺一個星期，「黑莓」電郵大幅度減少，呢位行政人員為之行唔安，企唔落，要公司嘅IT部門同佢仄機，仄過冇事，佢仲唔肯信，要RIM（ResearchInMotion，加拿大黑莓生產公司）維修部再仄，仄完發覺部黑莓完全正常。唔正常嘅係嗰位行政人員神經過敏，電郵少咗就成身唔安樂。呢啲叫做「黑莓症候群」，追數王目前仲未有。
諗起某次同賓架Ｌ同枱食晚飯，佢成晚都望住部黑莓，幾乎連左丁山都緊張埋一分。行政人員有部手機已經好唔得閒啦，近年興起黑莓隨身，更加攞命。星期一睇《金融時報》LucyKellaway專欄，專欄題目係"Toocrazybusyforsex?ThenbringyourBlackberrytobed"，夠晒吸引，內裏提到一位英國醫生寫咗一本書《CrazyBusy》（可譯為：忙到癲），醫生慣咗一向忙到癲，患上busyness症候群嘅行政人員畀意見；有一日，竟然有一位女士求診，女士話佢嘅老公夜晚上床攬住佢猛咁錫之時，將部黑莓放在佢身邊。女士問醫生：「老公行為是否正常？」醫生話如此老公，簡直瘋狂，但老婆居然唔敢直斥其非，仲要去問醫生意見，老婆亦都失常──因為見到老公一日到黑都離唔開部黑莓，竟然接受晒也。
二十一世紀嘅行政人員點解要將辦公室資訊帶上床，好難解釋，Kellaway話喺JaneAusten小說裏，主角人人悶到癲，為穿着甚麼衣服可以搞足一日，現代人就以忙到癲為榮，好似左丁山咁，身上冇一部黑莓，叻極有限啦，此人游手好閒啫。