近排「紅到發紫」嘅葡萄牙雙翼基斯坦奴朗拿度（C朗）同哥利斯馬，將會披上葡萄牙國家隊球衣，出戰歐國盃外圍賽對有「歐洲紅魔鬼」之稱嘅比利時；以葡萄牙嘅勇態，要炒起對手真係話都冇咁易，所以就算「讓球主客和」葡軍[-1]，都可以放心捧1.85倍嘅「主勝」！賴恩
歐國盃外圍賽聽晚重開，依家排喺A組第4位嘅葡萄牙，將會喺主場恭候同分嘅比利時；今場波誰勝誰負將會直接影響到兩隊嘅晉級資格，所以雙方都唔會想和波收場，始終兩隊一旦齊齊失分都冇着數，今場波戰意相當鮮明。
比利時焗攻聽衰
葡萄牙陣中有近排喺曼聯同賓菲加狀態「弗爆」嘅C朗同哥利斯馬，尤其C朗，佢係費高退役之後嘅「黃金新一代」靈魂，今季無論喺球會或者國家隊表現都成熟咗；以前成日俾人鬧佢掛住扭波嘅問題已經冇咗，反而積極參與球隊組織同進攻，睇佢上星期曼聯贏保頓場波交出3個助攻，印證唔少名宿嘅說話：「C朗係當今球壇最佳球員。」
今次由C朗領銜出戰比利時，以葡萄牙今時今日嘅陣容，攻有C朗同哥利斯馬，組織有阿曼度比堤同堤亞高文廸斯，守有美拉同卡維奴，喺上個月友賽兩球輕取巴西，同埋舊年11月大勝哈薩克嘅歐國外賽事，都充份表現「攻守兼備」嘅風格；今次主場出擊，對住同樣要爭勝「焗住」搶攻嘅比利時，隨時同對手大手交易，所以除1.25倍單W抵玩外，1.85倍嘅「主勝」都值得一試。
加納客W博得過
冷選方面，筆者就睇好加納友賽奧地利有機會開2.35倍嘅客W。自從舊年加納喺世界盃神奇演出之後，呢支非洲球隊嘅實力已經得到認同。今場友賽或者艾辛會因傷避戰，但前線嘅基恩同中場嘅蒙達利呢對烏甸尼斯「加納孖寶」，速度同默契兼備，今仗相信會有唔錯嘅表現，所以2.35倍客W博得過。
投資特攻隊金句
「C朗狀態『弗』到爆，今次國際賽要證明自己職業生涯更上一層樓，領軍大破比利時係最佳方法，何況葡軍又有主場之利，大勝可期！」