影相最忌手震，所以最近相機都將防震列為必備功能之一，不過細心留意嘅話，唔少卡片相機嘅所謂防震，其實只係透過軟件將相片作修正，講到底，只係一門「執相」功夫！呢種假防震，自然令唔少Snapshot友不滿，但二、三千蚊貨仔，你想點先？Ricoh就同佢哋SayNo，卡片機都可以有真防震，最新推出具備第二代CCD移位防震技術嘅R6，影相夠穩定，就好似穿過鏡頭睇呢個世界咁靚。
記者：許福合
攝影：陳盛臣
ImageGirl：Winnie
未賣街先爆CCD
今個星期Ricoh為R6搞咗個發布會，究竟呢部新機有咩優點？對於一般用家來講，揀機時佢哋首選外表，再來就係相機CCD像素、相片質素同功能。R6外表有三種機身顏色，分別係紅、黑同銀色，可以拍出700萬像素相片，基本上已可滿足到用家要靚又要勁嘅要求。
Ricoh都知玩家們絕對唔會咁輕易滿足，所以無論機身內外，都用上唔少新技術新科技，我哋更專登搵Ricoh幫手，將呢部未推出嘅R6作一個大解剖。除咗相機主同副電路板外，最值得用家留意係CCD感光組件部份，R6使用第二代CCD移位系統，可以唔受手震影響，拍出一張清晰相片，比起第一代防震系統，整體佔位更薄更細，所以能輕鬆安裝喺只有20.6mm薄機身之內，當手持拍攝時，鏡頭會利用CCD組件輕微移動，以抵消拍攝時對相片所造成嘅震動，據官方講，可以有7級安全快門防震效果。
影夜景穩陣
睇完CCD移位防震，可能有人會話「我隻手好穩，防震對我無幫助。」如果你都係咁諗，你就大錯特錯，一般日光下拍攝，快門經常可保持幾百分之一秒，當然可以話對震動免疫，不過遇到遠攝或夜間拍攝，相信無人敢寫包單，尤其R6有成7.1倍變焦，即係相當於28-200mm鏡頭，當Zoom到盡用7.1倍光學同4.8倍數碼變焦拍攝時，輕微震動都可以對相片造成影響，夜景更加唔在講，需要配合慢快門同高ISO拍攝，若然相機有防震功能，影相時一定可以安心同穩定得多。
人臉對焦快狠準
呢個功能喺推出之初，聽過唔少人話無用、用唔着，不過今時今日，差唔多$2,000至4,000價位相機，都將佢列為必備功能，甚至唔少換相機或買新機用家，都話要有佢先買。R6與同級相機不同處，係認臉方面能力比較強，人家只對一張臉，R6就比較花心，可以追蹤畫面內多達4張臉，不過認真起來仍然可以好專一，揀定咗之後，臉孔對焦速度之快同準確度高，亦確實令人相當爽快。而影人比影景，R6會更見好用，能因應臉孔調整白平衡同光源等設定，各位男士們替女友影相就唔怕影到對方面青青，咁失威喇！
防震測試
以下兩張相片，係防震系統開同關之後嘅比較，拍攝時使用上7.1倍變焦，室內拍攝，快慢約1/15s左右，可以見到用上防震系統，相片應可收貨，不過唔用的話，真係影到出鬼影㗎。
Profile
感光元件：724萬像素CCD
變焦：7.1倍光學+4.8倍數碼
屏幕：2.7吋
快門速度：8秒至1/2000秒
ISO：64至1600/Auto/Auto-Hi
記憶：SD/MMC/內置54MB
體積：99.6×55×20.6mm
重量：135g
查詢：Ricoh（22925111）
記者試用：
先唔講部機影相靚唔靚住，R6賣點係防震，官方仲話達到７級咁勁（究竟點分級數佢又冇講喎），但大家睇完上面兩張試相，感覺掂唔掂先？老實講，小記用慣單鏡相機，原因就係貪佢機身有少少墜手，兼且具手柄位，雖然重咗啲，但用落手震都冇咁覺；睇番R6，佢厚度得20.6mm、135g，真係太薄太輕，好多時仲焗住要單手玩HandHeld拍攝，唔好彩遇上陰天、影夜景，影像唔走位先奇，但以呢兩張試相嚟睇，分別的確好大，光學防震究竟啱唔啱專業級玩家?咁就因人而異喇!