時間
95年9月2日
活動
獅子會慈善活動
人物
李妮
經過
當年盛傳94年亞姐冠軍李妮同季軍曹央雲好唔妥，李妮曾批評曹央雲係「霎眼嬌」，曹央雲反擊大爆李妮嘅臭狐好勁。事件當時成為大家茶餘飯後嘅話題，為咗證明自己冇體臭，李妮95年出席獅子會慈善活動時，特別打扮到好性感咁到場，仲行近一班記者身邊，刻意舉高手臂，將胳肋底湊近記者個鼻，仲猛咁話：「你聞吓！」好似想搵記者做獵犬咁證明佢係冇臭狐。
可能李妮有備而戰，喺胳肋底噴晒香水，所以當時記者只係聞到一陣攻鼻嘅香水味，李妮又滔滔不絕咁話：「話我有臭狐？佢（曹央雲）都黐線嘅，我要話佢夠大把嘢講。我就費事同佢一般見識，唔通我又要周圍話佢有口臭咩！」
講番李妮同曹央雲呢對寃家，佢哋𠵱家都退出幕前，李妮就同細佬一齊搞生意，曹央雲就嫁咗俾上市公司嘉域集團主席何永安，仲生咗個女，上晒岸過住闊太生活，所以冇時間出嚟同李妮嗌交嘞！
本欄逢周一至周六刊出