「喂，水貨咪已經出咗一排囉，仲乜又講佢呀！」睇住水貨食行機市場，有啲唔甘心：第一，水貨好多時只有英文，就算你懶叻扮鬼佬，到需要收SMS嗰陣，中文字變晒做怪碼，問題就出嚟；第二，行貨比水貨通常多一套自家新玩意，例如好啱香港人用嘅Software；冇錯，今次行貨E65食正呢樣強項，內置BlackBerry、MSN兩項功能，行政OL、潮友必玩，加上有Sales話水機紅色版斷晒貨，得行貨有，呢鋪仲唔Win？
行政OL推蓋即用BB
據手機店Sales解釋，買商務手機嘅用家超過8成係男性，聽完呢個咁「粗略」嘅數據，小記好唔認同；只覺得現時具備BB分唇嘅機款真係唔多，數來數去除咗BlackBerry自己，跟住就輪到一大堆PDAPhone。但你會問：「嘩，咁大嚿，點用呀？」查實OL要出部電郵手機，要求都係細細部，靚靚仔仔嘅啫，E65外表未算好標青，但諾記滑趟機款式一向有Fans支持，好似佢除咗有深啡色之外，仲有呢一隻紅色，行近少少再睇，原來機背位採用仿皮物料，難怪拎上手特別舒服，OL要拎起佢推蓋玩BlackBerry，要覆老闆Email或者Send資料畀啲客，其實冇幾難。
玩MSN反應快
有啲人未必好似OL咁要每日SendEmail咁煩，佢哋上網唯一目的，係同班老死玩MSN狂Chat。其實早前嘅諾記InternetEdition，已經加入埋MSN分唇，呢次亦冇例外，有MSN友仲話，以前用另一款手機玩MSN，通常等幾秒先Send到個Message出去，E65反應居然比PDAPhone更快，真係估佢唔到！假如你係打SMS快過閃電嗰類人，E65都幾啱你㗎！
記者：陳國輝
攝影：陳盛臣
