望一望，仲以為隻手紮住繃帶，查實呢部係手機，真係講你都唔信！上個禮拜，德國CeBIT展覽就有間韓國公司Show呢部概念電話，佢命名為FingerTouching，換言之齋靠手指操控就掂，聽落好簡單，實情High-Tech到不得了！當你要打電話嗰陣，Keypad會經由手機紅光射落手掌，原理有少少似前排推出嘅一款手機專用Keyboard，直接㩒落去英文字投射位置，手機就會感應到你輸入啲乜；另一過癮之處，咪睇佢好似手錶咁設計簡約，原來機面配備咗彩芒，支援3G，撈埋玩VideoCalls都得㗎！
成日有人問：「究竟呢啲未來科技係咪得個睇字先？」唔怕話你知，早兩年日本已經公開骨傳導手機技術，原理仲誇張，係利用皮膚、骨頭等身體組織嘅震動傳聲，當時仲有人試過插隻手指落耳窿傾電話㖭，唔識嘢嘅人仲以為佢吹水，人類身體將成為手機一部份，睇怕係遲早嘅事！
記者：陳國輝