出得嚟俾人影相做訪問嘅名人唔多唔少梗有啲虛榮感，呢樣嘢大家一早明晒，但係過晒火位就只會俾人喺背後揞住嘴笑。話說有位由明星變咗今時今日阿太嘅「瘦文」，佢一副導彈身材，其實已經喺見報上佔盡先機啦，哈！佢最近做善事，點知都不忘showoff自己，就真係有啲唔對啦。話說「瘦文」憑住自己嘅人際關係，搵咗30個名人明星捐出珍藏，點知早前開完記者會，各記者獲派一隻光碟，以為裏面係啲捐出嚟嘅物品，嘩！點知打開一睇，全部係「瘦文」着住低胸衫喺度搔首弄姿，仲要係解像度超級大㖭，你話係咪睇到人搖晒頭吖！
撰文：阿蘇
本欄逢周一至六刊出