得番幾個月咋，豬腩肉、麒麟臂、甲組腳好快就要公諸於世！女人寧願一擲千金，買部減肥機匿埋喺屋企震脂、轆脂，係就係好方便，不過懨悶死人咩！以下四款日本新興的虛擬遊戲機，有齊後生仔至愛的滑浪、鬥波、踩板甚至飆車等全方位肌肉活動，仲騎馬仔減肥？滑浪好過啦！
記者：盧家蕙
攝影：楊錦文
Model：Hidy&William
減全身！乘風破浪室內滑浪板
透過模仿滑浪運動之動作，加速新陳代謝及燃燒脂肪。能有效收緊腰腹、臀部及大小腿之肌肉。備有三個等級（低、中、高速）速度可供調校。
SurfBoy $4,680
體積：76×36×20cm
重量：約22kg
圈數（每分鐘）：最高速約102圈，中速約95圈，最慢約81圈。
可承托重量：100kg以下
乘風破浪連環睇
好玩度：★★★★
出汗度：★★★★★
玩家Hidy：「模仿滑浪幾過癮，我會揀最高速來玩，刺激得來好似運動量大啲。最緊要擺好晒姿勢先開機，唔好周身郁，因為身體會上下、前後、左右咁擺動，想平衡一定要揸實把手，手臂、雙腳會不期然出盡力，肚腩同腰肢震到痕痕哋，全身感覺似做咗健身咁，幾攰吓，邊睇電視邊滑浪最好！」
小評：
上板唔使學，「衝浪」易過借火，冇濕身，幾時玩都得。持續反覆的擺動方式稍欠真實，刺激度大減，建議用Remote調節時快時慢的速度會好玩啲。
Hidy說：「以前覺得打機減肥好兒戲，不過咁大活動量，至少可以Firm到拜拜肉、大腿肉，而且一啲都唔悶囉！」
減手瓜！OneonOne鬥波
好玩度：★★★
出汗度：★★★
模仿美國Streetball的OneonOne鬥波情景，獨特的CMOS相機和球互相感應，插座就連接到電視機或錄像機，只要拎住似手球多過似籃球的波，不斷閃避鬼佬的攔截，Jumpshoot或入樽悉隨尊便。
小評：
當你見到鬼佬好囂張咁玩Streetball兼入樽，就會越玩越肉緊，手瓜自然出力更多！
減大小腿！扮板仔踩板
好玩度：★★★★
出汗度：★★★
毋須助跑，雙腳踩住迷你小滑板模仿起跳姿勢，一手要執起操控按實按鈕，便可順勢擱於牆上，擺出各款停留於空中的型仔姿勢。若動作過激，跣落地會跌傷兼慘叫！
小評：
玩耐咗就好易上手，而且對腳真係會踩到痠痛，又瘦幾磅喇！
減手臂減腰！揸車一族喪片
好玩度：★★★★★
出汗度：★★★★
模擬電單車，只須控制手柄，便會自行加速、煞車及轉動，讓你享受極速的興奮，成功晉級後更可改裝你的愛車，以配合越發崎嶇難行的賽道，緊張又刺激。
小評：
Hidy玩到扭晒軚，她說：「超刺激，好有真實感！同15個車手比賽，坐喺度玩會順手啲，越來越緊張，手汗都出埋！我覺得對減粗臂同粗腰好有幫助，因為個身真係會左扭右扭㗎！」
售賣地點：
J.C.Ladies（31022783）