蔡依林（Jolin）自與周杰倫嘅戀情畫上句號後，雖然同羅志祥傳過緋聞，不過只係曇花一現，反而Jolin年初去倫敦遊學，被踢爆同主演台劇《愛情白皮書》嘅男星彭于晏拍拖行街。事隔兩個月，佢哋嘅感情突飛猛進，呢個月初仲俾台灣《壹週刊》圖片影到Jolin去彭家密會4粒鐘。
鬼祟搭的士
今個月8號，Jolin喺台灣睇完醫生，由一部平治接送返屋企，據知呢部車係用彭于晏阿媽個名登記，但部車就一向畀個仔揸。到9號夜晚11點半，Jolin又獨自搭的士去彭于晏屋企，佢落咗車後，刻意用頂帽遮面，然後好敏捷咁衝上樓，好明顯佢係呢度嘅常客。
據講彭于晏嘅屋企人嗰時唔喺台灣，Jolin同彭于晏孤男寡女共處一室，確實惹人遐想。Jolin玩到第二日凌晨3點幾先走，仲鬼鬼祟祟咁上的士離開。
究竟佢哋兩個夜麻麻喺間屋度搞啲乜？Jolin日前接受訪問，就解釋話同彭于晏打𠵱家最流行嘅遊戲機Wii。不過Jolin嗰日明明唔舒服，點解仲有精神打機，唔通打機能醫百病？
