《蘋果》讀者經常有反應；本欄曾寫過一篇關於禾輋街市，一位「曉翠的張太」來電郵話禾輋街市有一間海鮮檔，最出名賣象拔蚌，可當刺身，可用以打邊爐，值得介紹。沙田讀者可留意吓嘞。「曉翠」好似位於大圍嘅銅鑼灣，住客去沙田街市，大圍街市比較近啲。呢位「曉翠的張太」竟然去到禾輋，想來必是熟客。
另一位讀者Ｓ來電郵講及中坑歌手，佢話既然有人辦ONJ、ElainePaige演唱會，佢好想左丁山代佢向主辦單位要求，辦一個澤田研二（SawadaKenji）演唱會。讀者Ｓ話佢係澤田研二嘅大大大粉絲，知道澤田雖然已經五十幾歲，但非常活躍，喺日本照樣開演唱會，唱音樂劇。如此講法，澤田研二仍在狀態，唔會差過ONJ，搵佢嚟香港唱番一兩場，咪話唔賣得喎。
嗱，有讀者獻計，請樂仕或披圖梁注意嘞。日本七、八十年代歌手𠵱家應該係五十零歲，唔知邊一位仲可以登台，如果搵到五輪真弓來港，左丁山第一個撲飛，至於西城秀樹呢類靚仔歌星，樂迷只怕英雄老，不忍卒睹咁就弊啦。反而五輪真弓呢啲實力歌手，淨係企響度唱歌，已經足以動人。前星期到文化中心聽美國女高音JuliaMigenes表演，唱怨曲、爵士、百老滙式舞台歌曲，佢雖然五十幾歲，歌聲一樣漂亮（雖然拉至最高音時，有啲坼坼哋）。呢類歌曲，喺香港可能曲高和寡，文化中心仍然有八成上座率，唔錯嘅嘞。聽呢啲歌手嘅，梗係中坑多啦。左丁山便見到醫生Ｔ夫婦，楊大社長與愛女及一啲名人，前機管局主席黃保欣一個人坐喺度，聽到入晒神㖭。
故此以澤田研二嘅名氣與佢唱嘅易上口日本流行曲，來港開演唱會，有得諗之至。記得澤田研二好似係前衞歌星，登台化妝甚濃，一啲男人睇到心郁郁，羅文好似曾經學過佢。如此歌星甚罕見，可說後無來者，希望佢收山前能來港多唱一會。