呢日啱啱喺濠江返嚟，去到碼頭至發現間「獨市」報檔竟然休息，想搵份〈蘋果波經〉，上船度番條靚纜都冇計！
諗諗吓，一眾名家戰友推介嘅貼士，雖然信得過，但始終都只係得一般開賽前受注嘅項目推介；𠵱家「走地盤」成行成市，喺噴射船度唔到波，返到去開埋波至諗吓落注都得喎，但就要靠自己心水。
平面媒體難做「即場」
𠵱家嘅平面媒體，喺賭波貼士推介及資訊方面，始終有時間上嘅局限性；莫講話好難做到「即場主客和」同「即場波膽」等「走地」項目嘅貼士，基本上真係連臨場賠率變動情況都畀唔到大眾。始終場波未踢，如果真係講到開賽幾多分鐘向邊瓣項目又點樣出擊，贏到笑？先知咩！得啖笑就真！
其實「走地盤」絕對有市場需要，尤其一般強隊如曼聯、車路士、巴塞隆拿及國際米蘭等，擁躉甚多；但除咗亞洲盤做到接近1賠1回報率外，「主客和」單W通常都好似雞胸肉咁，食之無味，棄之可惜。
開波後戰果萬變
一旦開咗波，冇人可以保證乜嘢強隊能夠喺早段已經入波領先對手，反而仲有先失球嘅機會；熱W隨時間流逝逐漸變得好分，賽前買咗反而呻笨！所以，其實除咗「走地盤」有市場之外，「走地盤」貼士都應該有需要，不過暫時都只得1個直播電視台做得到！文：華度