蟹，膏香而肉鮮，可是平生最怕食。因為食蟹好麻煩，用鉗插又要撬，撬完又要剪，剪完仲要撩。試過用牙生咬，結果唇爆牙崩。最慘是搞了半天，可吃的只有幾両肉；多吃，又怕寒涼，對蟹真的又愛又恨。不過，如果有人幫手拆蟹就唔同，仲一次過有18款蟹可以食得到，哼！今次仲唔有仇報仇！
記者：梁學文
攝影：陳偉強
Model：Colinda
日拆200公斤蟹肉
每次食蟹都會遇上同一難題，就是拆蟹，次次都花光力氣跟蟹搏鬥，換來的只有幾両肉，仲有滿手傷痕，所以對蟹沒甚好感。自從上年食大閘蟹被蟹殼插爆上唇之後，一直對蟹有所避忌。幸好，TheAtrium推出的全蟹Buffet全部由師傅拆肉，就算是原隻上的，唔使用任何工具都食到，大廚黃師傅話：「好多人都懶剝殼，又怕刺傷手，所以我哋就將啲蟹肉拆晒出嚟做菜，食嘅時候都方便啲。」所以每日廚師們都會拆出200kg的蟹肉做菜，都幾花心機。
海蟹比湖蟹好
平時去餐廳或酒樓食到的蟹，多數都是生長在淺水的湖蟹，而TheAtrium就會用來自12個國家的海蟹，好似日本、阿拉斯加、加拿大及越南等，黃師傅話：「一般嘅湖蟹都係生長喺淺水區域，不過海蟹就會喺深水啲，好似水晶蟹就會喺20幾米嘅深水區生活。海蟹嘅肉質同味道都比湖蟹同河蟹好，蟹味亦較鮮甜。」如果用其他醬汁煮湖蟹，膏就發揮唔到鮮味，跟醬汁沒有化學作用。反而用蟹肉較實及飽滿的海蟹較好，當蟹肉蘸滿醬汁，那種鮮甜加上醬汁的味道，更加惹味。另外，每晚都有差唔多200款菜式輪流上陣，絕不欺場。順帶一提，如果怕食得蟹多會寒涼的話，不妨叫師傅準備杯熱薑茶驅驅寒，免費㗎！
百里香3皇蟹肉餅
每位有一份的蟹肉餅集合雪花蟹、皇帝蟹同青蟹，一共3種蟹拆肉再加入薯仔一齊燜，然後再加入百里香一齊炸成肉餅，入口香脆，一咬蟹肉餅內的肉汁仲會四濺。
安格斯牛脷魔芋米煮松葉蟹
魔芋米用蒟蒻做，零脂肪零澱粉質，食多兩啖都唔怕肥。整道菜用白酒煮，酒香味較重，而松葉蟹配牛脷又是個嶄新的配搭。
椒醬毛蟹肉伴香草三文魚
日本毛蟹原本味道唔重，不過加入辣椒同麻醬煮過，味道濃郁。三文魚加入香草做到似啫喱，入口有點怪，不過溶於口之後，就滿口香草味。
冰鎮酒醉水晶蟹
3月當造的水晶蟹先蒸後斬件，然後加入上湯同紹酒煮汁，再放亁葱及番茄一齊浸4個鐘，水晶蟹肉夠爽口，而且索晒紹酒的香味。
精選必食蟹
阿拉斯加皇帝蟹
重量：約3kg
市價：約$1,000
入口啖啖肉，無論蒸或焗，肉質最鮮甜。
蘇格蘭睡蟹
重量：1kg
市價：約$500
蟹肉鮮味而且濃，整湯就最重蟹味。
日本毛蟹
重量：約800g
市價：約$400
雖然蟹肉質比較硬，最啱用嚟做蒸蛋。
美國珍寶蟹
重量：800g-1kg
市價：約$300
美國珍寶蟹唔好就咁咬，最好用椒鹽或者薑葱炒。
澳洲水晶蟹
重量：1.5kg-2kg
市價：約$300
白色蟹殼較少見，肉質較爽口鮮甜。
日本松葉蟹
重量：約250g
市價：約$200
淨食經已夠味道，用嚟做魚生最好。
加拿大雪花蟹
重量：約250g
市價：約$100
雪花蟹雖然蟹身細，不過蟹肉多，適合做沙律。
越南軟殼蟹
重量：150g-200g
市價：約$100
軟殼蟹個殼夠薄，炸過至食脆卜卜。
睇路搵食
TheAtrium （23155199）
地址：尖沙嘴彌敦道118-130號美麗華酒店
供應時間：每日6:30pm-9:30pm
價錢：成人$368/位
小童及長者$221/位