OL日日對着電腦，近視機會都幾大，有日行開屈記買日常用品，發現到對波波眼鏡，說明書上說網狀視片可以有助矯正視力，毋須用電池，我正在想：「無遮無扇神仙難變啦，唔信佢！」話未說完，一班OL很有興趣地談論，最後有三人付款買了。嘩，每個$400多元，咁捨得，唔通好勁。
OSIM亦有類似眼部按摩器，說明書又說有助矯正視力仲可以減輕黑眼圈，又有波波網，又有按摩，當然要試吓啦。
點知呢幅眼鏡一味震，震到鼻都痕埋，以為捱完幾分鐘啫，哼，臉上竟然有4個海綿位印喺塊面度，半日都不散，肉酸到死。在辦公室用完，情況就幾大件事，所以用來煲電視，我部Plasma比起傳統電視無咁傷眼，尤以強光畫面或字幕最為明顯，至於LCD嘛，快動作時Delay畫面搞到眼都花埋，但用這幅眼鏡來睇電視，仲矇多兩錢重。
要預防近視，都是傳統好，盡量減少望向反光面，保持適當距離，即係把手伸直眼望向電視的大小和你手掌大小相約就差不多了。
文：林愛雯
Bytheway
現代人會為健康，不惜花費很多金錢買些輔助用品，其實人天生有自我康復功能，要改善近視，其實可以多望遠一點的東西，或遠處綠色的景物，不用花無謂金錢。國內部份小學會教學生按摩眼睛，保持眼晴健康，但香港呢？一味讀書，讀啦，眼盲都要讀。我女兒和同學就是好例子，她寫字時看得很近，又經常在巴士車上看書和做功課，但也沒有近視，解釋只有兩個，1：她們擁有超人的眼晴，2：她們的學校位於大自然，只要推開課室門，眼前就是大山大海。
文：伍旋卓