沐浴在愛河中的女人心情特佳，李嘉欣前晚出席手袋活動時再度滔滔不絕大談男友許晉亨，指男友對她無微不至，由她話事，現階段嘉欣更訂下「三不」－－不同居、不結婚、不生仔，許公子也不敢有意見。
大美人李嘉欣前晚往中環出席法國手袋品牌LouisQuatorze的手袋騷，她獲大會送贈獨一無二、價值近16萬元的蛇皮手袋。近期每次出現，嘉欣都慷慨大談男友許晉亨，前晚繼續「連戲」滔滔不絕談愛郎。記者指嘉欣每次現身公開場合，一次開心過一次，是否感情穩定，婚期不遠？她說：「我冇講過（結婚）呢樣嘢噃。」
介意男友被踩
早前何超瓊指她已開花結果，是否意味着已與許晉亨辦妥離婚手續？嘉欣說：「每個人同其他人嘅關係係分開嘅，我哋（指她與許晉亨）有我哋嘅諗法，暫時唔希望結婚，同人住唔係咁簡單，都係慣咗一個人自由啲。」不渴望做許太嗎？嘉欣說：「我恨佢做我男友多過係我老公，佢𠵱家都開心呀，大家相處得好好。」
再問嘉欣有關台灣富商郭台銘公開徵婚，她也是符合條件之人，嘉欣一聽說：「唔關我事，喺呢個物質社會，條件好嘅男人係容易吸引女性嘅，不過我覺得錫我先最重要，用錢錫係另一回事，唔通個男人破咗產即刻去搵第二個咩？」嘉欣坦承許晉亨用愛打動她。有記者指許公子給人感覺有點裙腳仔，嘉欣一聽即大反應說：「我好介意人哋咁講，我唔鍾意你哋話佢唔好呀，佢係好男人，形象斯文，有次雜誌寫佢鬧咗我幾個鐘，佢都好介意同我講：『我咁錫女友，本雜誌咁樣寫，我好介意』。」
冇壓力話晒事
嘉欣豪語指男友沒有壓力給她，任由她話事，例如現時訂下「三不」－－不同居、不結婚、不生仔，並指許公子有日也笑着反問她：「你三不，咁搵我嚟做乜？」，嘉欣說：「但係我就係鍾意𠵱家咁，有自己空間。」最後記者問她兩人是否有愛冇性？嘉欣即啋了一聲。
採訪：RitaLeung
攝影：RickyChan
