【上海直擊】古天樂同韓國人氣偶像宋承憲日前應邀到上海出席樂天百貨嘅宣傳活動，難得同場，影迷為咗爭見佢哋一面，不惜偷偷混入會場，希望近距離接觸偶像。
宋承憲日前中午抵達上海浦東機場，同行仲有經理人同保鑣共十幾人。雖然只得幾十個內地fans接機，但宋承憲依然好親切咁接過佢哋嘅禮物同打招呼，仲為佢哋簽名近20分鐘先離開。不過宋承憲夜晚出席活動時，態度就180度轉變。
完全冇交流
着住筆挺西裝嘅宋承憲，為咗凸顯自己嘅身價，事前同大會講好咗只會出席活動，唔會接受任何傳媒嘅訪問。當宋承憲同古仔一齊企喺台上時，佢全程斜睥住古仔，兩個又一啲都冇互動，連普通交談都冇，唔知係咪因為大家雞同鴨講呢？宋承憲逗留咗一陣就走咗，返咗去佢下榻嘅酒店。
論人氣，宋承憲好似係高啲，不過講到親民喎，都係古仔比較識做，佢又應大會要求唱歌助興，為活動增添氣氛。
