舒淇和李彩華等人前晚在銅鑼灣出席新片《森寃》的首映禮，雖然舒淇以一身低胸公主裙到場，不過李彩華也不甘示弱，以埃及妖后造型，再加上頭上逾400萬鑽飾，成功搶去舒淇的風頭，不過她自言怕太張揚，戴上鑽飾後只敢從後巷離開髮型屋。
由舒淇、李彩華、鄭伊健和周俊偉等主演的電影《森寃》，前晚在銅鑼灣時代廣場舉行首映禮，兩位女主角打扮得明艷照人，舒淇穿上由BottegaVeneta贊助的低胸公主袖長裙，雖然睇頭十足，但論搶鏡程度仍不及另一主角李彩華，她以埃及妖后頭襯大露背兼大騷長腿，頭上再配襯由珠寶贊助商贊助的400萬鑽飾，行頭冠絕全場。
李彩華說：「珠寶商特登派咗個人嚟保護我，我喺髮型屋整完個假髮走時，都要喺後巷上車，怕太過張揚同危險，自己咁大個女係第一次戴咁貴嘅鑽飾。」
舒淇詐儍扮懵
《森》片在泰國取景，伊健跟兩位女主角拍攝時分別傳過緋聞，當中傳出舒淇為迎合伊健興趣，跟對方打羽毛球。問舒淇拍戲時可有特別深刻的事情，她反問記者說：「係恐怖定乜嘢呀？」記者打趣說是打羽毛球，舒淇即說：「打羽毛球嗰啲唔使我講，你哋都知啦，拍戲個森林入面有好多假樹，啲樹好似個人咁高，好恐怖。」問她在拍攝時可有見過伊健的女友蒙嘉慧，舒淇故作不知地說：「邊個蒙嘉慧呀，我唔識喎，我乜都唔知呀。」再問她可有男士往探她班，她笑說：「有呀，嚟影打羽毛球嗰啲咪係人囉，你哋仲清楚啦。」
伊健撐蒙嘉慧
伊健透露目前正在放假，並有相約女友蒙嘉慧（YoYo）打羽毛球。有報道指YoYo曾背着伊健拖另一男士，伊健對此力撐女友說：「唔回應呀，太無聊，鍾意寫乜就寫乜，但最好唔好煩人哋，唔好騷擾我屋企人。」其實該報道出街後，有報道影到伊健跟YoYo拍拖逛唱片舖，二人感情似乎未有受到影響。
此外，前晚寰宇舉行首映後即到灣仔王子酒店開P，舒淇、伊健、李彩華和蕭定一等均有出席，狂歡至凌晨1時許才散去，酒後面紅紅的舒淇偕兩名女伴先上車離開；伊健離場時，約10名在場等候的女fans即上前包圍，其中三名是日本女fans，伊健與她們寒暄後，便由經理人林珊珊陪同上車，返匡湖居寓所。
採訪、攝影：駱華齡、陳俊強、娛樂突發組
