黎明女友樂基兒，以及另一天王郭富城緋聞女友熊黛林，前晚均以性感姿態示範時裝品牌PatriziaPepe春夏新裝。勇於承認拆彈的樂基兒與近日上圍忽然谷爆的熊黛林同場較量，雖美態各有千秋，但樂基兒身負領軍及壓軸重任，兼穿上超性感的開窿衫上陣，氣勢稍勝一籌。
時裝品牌PatriziaPepe前晚於跑馬地舉行07春夏時裝騷，由兩名天王女友、黎明女友樂基兒及郭富城緋聞女友熊黛林聯同多名模特兒，示範該品牌性感火辣的新裝。其他嘉賓包括「翻版栢芝」閻清，以及汪詩詩汪圓圓姊妹花也以性感打扮到場，不讓台上模特兒專美。
警覺性低賴近視
樂基兒前晚擔任開場及壓軸模特兒，盡顯一姐地位，她透露近期較少露面，是因為今個學期上堂次數比較頻密，另外早前又往韓國及澳洲工作。
問樂基兒去年聖誕節與男友黎明往日本滑雪，被偷拍到兩人像樹熊般緊抱的照片有何感受，她笑說：「得啦，都過咗去，都俾人影晒啦，就嚟4月啦，仲講。」記者問樂基兒是否太專心拍拖，以致警覺性減低，她說：「真係冇留意有人（影），我嗰陣忙緊滑雪吖嘛，同埋我有200度近視，又冇戴眼鏡，所以睇嘢迷迷糊囉。」
王賢誌前晚也是PatriziaPepe騷的座上客，被問到早前在Diesel派對中姣磨筋肉男一事，他淡定地回應說：「件事係一個幾搞笑嘅誤會，嗰個係我一個新加坡朋友嘅朋友，嗰晚我帶佢嚟睇明星啫，又話我摸佢，又話下身緊貼，嗰晚咁嘈梗係會咬耳仔。」
開懷看同性戀
問王賢誌父母有沒有問及此事，他說：「冇乜嘢，我鍾意啲乜嘢人佢哋一直都知，佢哋知唔係事實，總之我鍾意男或女都唔重要，最重要係我鍾意嘅人同鍾意我嘅人知道乜事就得，其實喺呢個社會，要以開懷嘅胸襟去睇同性戀。」
採訪:林妙萍
攝影:林德雄
