時間
97年8月
地點
中環某髮型屋
人物
李明慧
經過
港姐選美年年有，但講到選完之後仲要鬥餐死嘅，非97年翁嘉穗攞冠軍嗰屆莫屬。當年港姐冠、亞、季軍分別係翁嘉穗、李明慧同佘詩曼，咪睇阿佘今日是非多多，當年佢拍住翁嘉穗同李明慧，真係企埋一邊。
當年李明慧被影到同有老婆嘅上司goodbyekiss後，佢自爆同七海化工老闆鄔友正好事近，點知翁嘉穗立即飛撲出嚟澄清佢先至係鄔友正嘅「TheOne」；99年翁嘉穗同鄔友正拉埋天窗，結婚生仔，到今時今日依然幸福美滿，而選美同情場都輸畀翁嘉穗嘅李明慧，就如同人間蒸發。
其實，佢哋除咗爭仔之外，仲發生過超爆笑嘅漏bra事件。話說97年8月佢哋去星馬親善探訪期間，有雜誌踢爆其中一位當選港姐去中環一髮型屋set頭換衫時，唔小心漏低個bra，兼且因為怕瘀皮而唔敢認領。事後李明慧俾記者追問呢單嘢時吞吞吐吐，相反翁嘉穗同阿佘就理直氣壯咁話知道呢件事，又強調個bra唔係自己嘅，有意無意間篤咗李明慧出嚟，好明顯，翁嘉穗一早唔妥李明慧啦！
本欄逢周一至周六刊出