「萬人迷」碧咸變身陳冠希？冇錯，呢位球星喺adidas推出嘅街頭服裝系列，大走HipHop路線，頭笠冷帽，着晒大一個碼嘅衫褲，幾鬼美國街頭feel呀！
攻打美國年輕人市場
據講，31歲嘅碧咸今次老鬼扮後生，係受到偶像美國Rap歌手Eminem所啓發。不過呢位歌手，無論場外行為同歌詞內容都惹起不少爭議，好似同碧咸嘅好佬形象，有啲背道而馳喎。
其實，又好難怪碧咸整古做怪，因為佢夏天就會加盟洛杉磯銀河隊。正所謂入鄉隨俗，如果碧咸成個英國紳士咁到美國，容乜易成為「萬人柴」！
不過，碧咸咁着都可能係想吸引更多美國年輕人踢波啫，因為佢之前講過：「我唔會蠢到要將足球變成棒球、籃球咁受歡迎，但我會嘗試吸引更多年輕人參與。」
點都好啦，adidas今次推出呢個系列服裝夠晒聰明，因為可以趁碧咸未去美國前，試下佢喺當地嘅號召力到底有幾大！如果效果一般，就可以考慮下其他包裝手法。