國際米蘭前鋒阿祖安奴真係死性不改，周一被傳媒踢爆參加完周日場聯賽後，喺夜店同一名籃球員打交；國米忍無可忍之下，已經打算羅致費倫天拿前鋒東尼，諗住季尾踢走阿祖。
據講，周日晚阿祖打完2:1贏阿斯科利場波後，約埋朗拿度去間叫「荷李活」嘅夜店蒲，點知兩杯落肚後，同一名叫路蘭度嘅職業籃球員先口角後動武；目擊者又話朗拿度曾企圖分開兩人但無效。
事後，阿祖透過國米官方網站澄清當晚只係發生小誤會，「少少事都被誇大報道！」咁即係承認有去夜店喇！其實今次係佢今季第3次夜蒲出事，咁唔生性，我求大俠都唔幫佢。
國米加緊斟東尼
成件事仲有個謎，就係朗拿度當晚究竟有冇喺現場，佢周一要去法國馬賽同施丹一齊參加慈善賽。朗拿度收到記者電話即時否認有去蒲，仲話周一先收到阿祖電話話唔可以參賽。呢單嘢通天後，國米加緊羅致費倫前鋒東尼，唔好以為國米絕情呀，全部都係阿祖你自己攞嚟！