鄭智發威，國內傳媒鋪天蓋地報道，歐洲體育媒體就唔同，將焦點放喺法甲巴黎聖日耳門（簡稱PSG）連續4場吞蛋輸波、越嚟越接近降班嘅事件上。
近33年未嘗降班
我求大俠先為呢隊過氣班霸算一算命，睇佢餘下9場賽序，仲要對里昂、朗斯及波爾多呢個榜首3雄組合，都咪話唔危。聖日耳門衰成咁，難怪本報名家華度戲言，法國係時候「遷都」里昂啦。
平心而論，聖日耳門前日作客輸俾雷恩0:1場波，係有啲唔抵；佢哋失守前形勢大好，就算到76分鐘失守後，仍有好幾次扳平機會。睇見因頭部受傷，紮到成個「白頭摩囉」嘅森美查奧爾，完場前奮不顧身頂波中橫楣，波唔入而自己就血流披面，場面認真悲壯。
聖日耳門近期先後喺法足盃及歐協盃出局，家陣喺法甲29戰得28分排尾二，極可能自1974年以來，首次降班！如果係真，對於曾帶領里昂揚威法甲嘅教練拿古恩，固然係老貓燒鬚；而葡萄牙前鋒保列達同埋法國國家隊龍門蘭特奴，亦可以搵定頭好住家囉。