瘋瘋癲癲幾年後，潛藏馬交嘅「隊草輝」，上星期終於俾當地官府判入監，一代年輕富豪落得如此下場，都咪話唔欷歔。之但係唔係個個落難富豪，都好似佢咁唔好彩，好似「燉湯佬」，話就話喺黃浦江坐牢，咪又係自出自入繼續歎！講起佢兩公婆，除咗香港上流社會會懷念佢哋，另一個唔會忘記佢哋嘅，應該係會計界班精英！一切就要由流傳咗幾年嘅「計數雙雄酒店逃生記」故事講起……
當年燉湯佬兩公婆檔「血濃於海」出事後，阿爺即刻做嘢，其中一個工序就係搵人接管佢哋名下幾件比較重要嘅資產同埋查數，「中標」嘅計數行雖然知道呢件係蘇州屎，但阿爺叫到唔likey都無辦法，於是就派人核數，第一件就係秤佢哋用4億幾買入嘅大飯店！點知第一次行動就出事……
唔知點解燉湯佬咁好招呼，特登響浦東某酒店開咗間房，畀計數行一中一洋兩件「𡃁」仔慢慢計，兩條友亦施施然上房，殊不知上到去，數就冇得睇，但就即刻俾人鎖響房，做乜？
扮屈服出生天
梗係俾人「邀請」幫手「做數」啦！咁兩條友始終年少氣盛，又有啲傲骨，利誘之下都唔肯同燉湯佬同流合污，但搞搞吓搞咗十幾個鐘都唔係辦法，於是咪扮屈服應承，而呢個時候燉湯佬啲𡃁開始有啲鬆懈，兩條友先至成功逃脫，但用乜計得呢？兩個人之後點都唔肯再講，總之就好似俾人侵犯嘅小朋友咁，一世都有童年陰影！
講番燉湯佬，個老婆就響香港受靶，佢就低調咁響黃浦灘過其富豪生活，間唔時仲會現身啲私竇繼續蒲，唔知搵咗佢好耐嘅廉記點睇呢？