田雞可以有乜嘢「死」法？焗飯、燉湯、煲粥、炒球……好好味但平凡無驚喜；講到食得刁鑽，太子南北嚼最近新加咗個老派農家風味──醬爆田雞扣，田雞邊度有個扣？扣者，胃壁也！30幾個田雞胃炒埋一碟，靚女Naomi話：「咁核突點食呀！」逼佢食咗一嚿之後，結果成30個田雞胃俾佢「隊」清晒呀！
記者：朱崇德 攝影：譚盈傑 Model：Naomi、阿Wing
醬爆田雞扣$42
田雞胃點解叫田雞扣？經理健哥答話人人咁叫，道理為何，解釋唔到：「或者似鈕扣啩！」以麵豉、辣椒香爆，未入口聞一聞，已感非常惹味：「平均炒1碟要用30多隻田雞胃，須知絕對係好難攞貨，否則都唔會咁少舖做到！所以每日限量供應10零碟。」論味道，入口絕對爽口煙韌，嗰種彈牙嚼勁，直逼墨魚吸盤咁爽脆。
香辣駝峯肉$45
好多人都知駝峯肉有滋補養顏藥用價值，來貨貴、入貨難，係佢唔通行、唔係咁多地方有得食嘅原因；入口感覺油脂好低，有點似鴕鳥肉咁清爽，但爽爽的口感，就似食緊豬面青。以紅黃波椒炒，食落香辣又惹味，$45咕嚕肉咁嘅價錢，好抵啫！
鐵皮啫羊鞭$45
個名真係幾驚嚇吓，真係食到繪影繪聲！上枱一刻兩個Model仲誤以為鐵板炒烏冬：「因為我哋特選BB羊鞭，望落會幼身啲，不過口感就爽脆軟身好多！更重要係冇晒大羊嗰種羶味，零舍好味！」
醬爆野兔肉$45
野生活捉嘅走地野兔肉，唔係咁多地方食到：「好味處係油脂成份會平均啲又少啲，兔肉味濃好多，肉身亦嫩滑啲！」以醬爆方式嫩炒，炒得勁亁爽，肉汁全部鎖在兔肉內，真係啖啖香濃野兔味。
鐵板梅花鹿肉$45
梅花鹿肉亦係香港比較少有得食，論肉質，味清香冇油脂，絕對係健康食品；一般煮法係燜焗，今次改以薄切鐵板上，一箸夾下，軟身有如棉絮，配以長葱段老派農家做法，入口清香。
香芋墨魚卷$42
一般上12"長墨魚，舖頭都會用嚟蒜蒸或炒，因為幾叫得價吓；不過做墨魚膠一定要夠大先夠彈牙。釀入春卷皮加椒絲酥炸，出面脆口、裏面彈牙，散發陣陣墨魚清香。
晚5朝6．晚晚通頂
太子新開有間南北嚼！問好多人會答：「知！」但亦答：「唔知！平日見佢成日關門。」原來佢每日傍晚5點開舖！打住邊爐火鍋、食住農家風味小炒，兼夾日日睇住波，通宵達旦食到第二朝9點，有啲客風趣咁話係「夜場式經營」！我就覺得係配合香港人夜夜唔瞓覺嘅生活節奏！
冷門食材．爽脆滋補
呢期玩得好激！田雞扣、羊鞭、駝峯肉，真係食得幾冷門，經理健哥答話：「咪睇感覺好似食野味、好補咁，其實每一樣材料有一共通點──爽脆！正是利口又滋補！」不過講到小炒靈魂所在，就係30多年農家菜經驗大廚Sam哥：「港式粵菜雖則講鑊氣，不過通常炒到打芡水汪汪；農家菜做法特色，就係以炒得香口、亁身為主打，煮呢類近野味式食材，尤為惹味！」
食神評級
食物★★★★★
價錢★★★
服務★★★★
環境★★★★
讚
價錢平，最緊要碟碟炒得亁身、汁收得緊，用農家煮法味道肉汁鎖得緊，比粵式炒到水汪汪要打芡，真係惹味好多！
彈
位置幾刁鑽吓，兩個Model完全搵唔到，謹記喺太子荔枝角道，近浴德池斜對面。
睇路搵食
南北嚼（35808185）
地址：太子荔枝角道62-64號地舖
營業時間：5pm-6am
