電盈主席小小超李澤楷突然旋風式訪問台中兩日，成為當地大新聞，究竟小小超係咪有意喺當地大舉投資房地產？更係全台中關心嘅焦點，不過，李澤楷就話，今次到台灣，純粹係探望台中市長胡志強同胡夫人邵曉鈴。
上個禮拜六小小超抵達台中，即刻直抵胡家，仲同胡夫人傾咗半粒鐘至離開，似乎用行動嚟粉碎市場嘅揣測。原來小小超喺20年前，曾打電話去台灣，請教當時出任新聞局長嘅胡志強，雙方就係咁唔經唔覺識咗20幾年。舊年胡夫人遇上車禍，小小超都有致電慰問。
發展商望帶挈台灣樓市
最鬼馬嘅係，小小超今次出行帶埋集團（電訊同地產部門）主管，同當地18家地產公司負責人食飯，交換意見；聽講小小超曾問過台中嘅樓市、建材同人工等行情。
啲發展商就乘機向小小超大力推介地產項目，心情極為興奮，除咗因為憧憬小小超嚟投資外，假如連超人李嘉誠嘅長和系都進軍台灣房地產市場，咁就不得了，到時當地樓市肯定熱到爆，大家就發大達嘞。
為咗招攬呢位貴客，台灣立委盧秀燕就諗到用美人計呢招，猛話要介紹女朋友畀仲係鑽石王老五嘅小小超，希望將佢留喺台中，連胡志強都附和，但係小小超聽完後就冇乜回應，仲笑得好尷尬㖭，似乎唔多受落。睇嚟台中各界要度過啲新橋至得嘞。
[email protected]