日本有神戶牛；美國有西冷扒；咁中國代表一定是牛腩，當中坑腩是一眾嗜牛如命的食客公認為至好味的部位，肉質夠腍又夠牛味，但係最近收風知道興食更刁鑽的崩沙腩及爽腩，試食後感覺有驚喜，煙韌又爽口，牛味夠濃，絕不比坑腩差，好牛者快啲去試試，必定會過足癮。
文︰蔡樂
攝影︰伍慶泉
Model︰Algie
崩沙腩沙河粉$26（$45上湯淨食）
因為腩肉和膠質層層相間，所以咬落的口感煙韌，食過後牛味齒頰留香，必食推介。
爽腩沙河粉$24（$40上湯淨食）
爽腩是坑腩的一部份，爽口之餘，肉質亦較坑腩薄身，以清湯煮成，可保持原裝味道。
牛筋丸淨食$20
將牛筋丸放入口，口感已一流，比坊間有嚼勁，反而牛味不夠濃，是美中不足之處。
牛乳龍眼浴$24
來自泰國的新鮮龍眼，用人手去殼去核，肉爽清甜，水牛乳隔水蒸燉後又滑又香。
紫米奶黃湯圓$15
糯米粉混入了紫米，吃起來多了𡁻口，口感亦煙韌，不過內裏的奶黃嫌太甜。
另一推介：水牛乳雙皮奶結實味濃
雙皮奶亦很受歡迎，一隻乳牛每日可生產約40公升牛奶，而水牛只可生產約5斤水牛乳，所以特別矜貴。而店中的水牛乳是來自順德大良的農場，在當地消毒後才運到香港，之後要隔水燉，以保持濃郁的味道。水牛乳質地比普通牛乳濃稠，做出來的雙皮奶份外結實，蛋白質、維生素的含量亦較高，營養更豐富。
紅豆雙皮奶$22
正宗大良雙皮奶，來自大良的師傅每天用水牛乳製成，奶味濃郁，亦較漿口。
比坑腩更矜貴
坑腩是牛胸八支骨前的腩肉，肉質爽滑，是最肥美的部位。而御品軒卻主打爽腩和崩沙腩，所入的坑腩要一大塊，以確保坑腩尾部連着最好的爽腩及崩沙腩。崩沙腩肉質較腍，還帶少少牛筋，腍得嚟有𡁻口，食落不黐牙。而爽腩則位於崩沙腩隔鄰，面積比崩沙腩還小，價錢貴坑腩一半，入口如其名般爽軟不硬，有少許黐牙。
熬12小時牛腩清湯
喜歡食牛腩的人，亦很重視牛清湯，所以御品軒的牛清湯亦一絲不苟，用牛的尾龍骨熬湯12小時，將一半的牛骨湯用來燜牛腩，已煲煮了12小時的湯充滿牛肉香，還加入了特別處理過的薑，把牛腩肉味道帶出來，用來燜煮過的牛腩都特別香濃。而爽腩和崩沙腩都帶有膠質的關係，燜好後咬入口比平時多肉汁，牛味在口中久久不散。
崩沙腩的口感則多了一份煙韌，因為肉和膠質一層層相間，而1隻約4至5歲大的牛只有10斤崩沙腩，約佔坑腩的1/8，煮好後縮一半，只得5斤左右，所以幾矜貴。
爽腩位於坑腩尾部的位置，約佔坑腩的1/10，口感的確較為爽口。
睇路搵食
御品軒（28825335）
地址︰銅鑼灣東角道24-26號怡安大廈怡東商場地下6-8號舖
營業時間︰11:30am-12mn
交通︰銅鑼灣地鐵站E出口
座位︰約80個
