時間
99年4月
地點
金慧英寓所
人物
金慧英
姜皓文
經過
咁多年嚟，娛樂圈間中都有聽聞一啲女藝人被虐打，但俾人打到變豬頭之後，都依然能夠勇敢面對、毫無保留咁任影唔嬲，兼且巨細無遺咁將成個虐打過程講古仔咁講番出嚟，睇怕除咗金慧英之外，唔會再有第二個。
口腫面腫數臭男友
原本寂寂無聞嘅金慧英，98年因為男友姜皓文（黑仔）瞞住佢搭上陳梅馨而聲名大噪，由閒角變成頭條新聞女主角，全世界人都對佢寄予同情。最搞鬼係黑仔呢頭話同金慧英分手，嗰頭又去女方屋企幫手通渠，三角關係搞到烏煙瘴氣。結果99年4月，終於演變成暴力事件，黑仔去到金慧英屋企發爛渣，霹靂啪啦打咗佢十幾巴，俾黑仔打到口腫眼腫不似人形嘅金慧英，第二日即時開記者會，將傷勢公諸於世，佢仲繪聲繪影咁將自己俾黑仔打到飛起，以至兩個人床頭打交、床尾大被同眠嘅過程一五一十講番出嚟！
更曲折離奇嘅係，金慧英被虐打之後唔單止冇報警，而且幾個月後仲肯同黑仔拉埋天窗，唔通真係打者愛也嘅表現？不過，月前黑仔被發現同35D魔鬼身材嘅王從希夜蒲劈酒，唔知黑仔七年之癢經唔經得起考驗？
本欄逢周一至周六刊出