賓架Ｗ請食晚飯，臨時改地點，事關當晚碰上曾梁大戰，電視直播唔睇唔得，賓架Ｗ立即轉訂一家飯店嘅私人房，內有LCD電視，大家一路食飯一路睇，居然互不出聲，靜靜地聽曾梁兩人鬥嘴。
聽完之後，眾人評論邊個贏，爭議一番，結果認為梁家傑以點數勝，曾特首比起上一次，放一啲，守中帶攻，但以佢嘅四十年公職政治資歷，其實可以講得更好，梁家傑面對有備而來嘅曾特首，佔唔到幾多甜頭，但係在電視上，梁表現較為自然，面色較紅潤，態度輕鬆一啲，反而曾先生嘅面部化妝有問題，基金Ｆ一路睇一路話曾先生面青青，過於緊張，尖嘴Ｌ對電視鏡頭較為熟悉，指出燈光與化妝可以影響曾先生嘅面部顏色，未必係內心緊張嘅反映。
梁家傑作最後陳詞，本可利用兩分鐘，打出一記重拳，但係梁先生臨門腳軟，或者因為企得太耐？佢嘅總結有神無氣，好似帶波單刀而射唔入龍門，可惜也。
無論邊個贏呢場辯論都好，於大事無補，三月二十五號選委選舉，一定係曾先生贏，梁家傑能緊守一百三十票，已算冇輸到，選舉制度如此，奈何？你我都冇權投票，我哋嘅意見不能左右大局，是否就要因此認命？非也，梁家傑之參選，明知輸梗，不可為而為之，有人認為佢違反民主原則（如社民連就抗議佢參加小圈子選舉），但不可否認的事實係，梁家傑成為候選人之後，曾特首不敢置諸不理，不能藐視另一候選人的存在，故此願意參加兩場電視直播「辯論」，卒引起三百萬人睇電視，引起所有報紙電台廣泛報道，令到香港人對特首選舉制度之認識，空前未有，更加認識到香港選民冇資格投票嘅荒謬性。小圈子特首選舉制度即使負隅頑抗，但其公開性經此一役，已經確認，以後好難再有一人自動當選，或者特首唔須要過公開辯論呢一關，親政府派好難漠視民眾之認受性。從呢個角度睇，梁家傑參選雖然有輸冇贏，但香港有贏冇輸。