做人老公甚艱難。話說張家輝的妻子關詠荷產女後復出，主演的無綫處境劇《同事三分親》上周首播即收視高開，平均獲181萬觀眾捧場，對於老婆發威再成收視福將，家輝固然開心，不過代價卻是他要父兼母職，日日在家做湊仔公，前日更親任柴可夫湊女探媽咪班，難怪他揚言後悔讓太太復出拍劇。
近日無綫黃金時段播出的三線劇集收視平平，為刺激收視，無綫特邀42歲的關詠荷出山，主演接《高朋滿座》後播映的處境劇《同事三分親》，向來被譽為收視福將的關詠荷果然不負眾望，上周《同》劇首播收視高開，平均有28點收視，即獲181萬觀眾收看，而無綫午夜時段重播其舊作《陀槍師姐》，同樣係威係勢，平均收視也有7點（即有45萬觀眾），周五晚最高收視更達9點（即58萬人收看）。
有型B女
扮靚靚探媽咪班
雖然關詠荷開工過關斬將無往而不利，但事業家庭始終難兩頭兼顧，家中湊女重任自然落在老公張家輝身上。自從她復工後，家輝幾乎有街不敢去，全職照顧一歲B女Brittany的衣食住行，前日更駕車載B女到跑馬地探媽咪班，現場只見家輝這個大男人裙拉褲甩，身上還掛着一條孭帶，造型相當惹笑。
前日下午約4時，一身白衣的關詠荷在跑馬地墳場拍攝《同》劇外景，劇情指她帶花束拜祭前夫，其間記者發現家輝的寶馬座駕一度停泊在附近，未幾又駕車離開，兩小時後，家輝再次到場，當時他抱着穿冷外套、黑色leggings和小波鞋、打扮得有型有款的小B女，關詠荷乍見丈夫和愛女不禁開懷大笑。
記者請家輝與妻女拍攝合照時，他即問太太：「記者話影張相喎，得唔得呀？」她示意沒問題，但拍照後家輝突然苦笑說：「畀你影到我條孭帶㖭，似晒湊仔公。」
唔敢出街
「後悔畀佢接部劇」
其後家輝透露近日的湊女生涯充滿男人之苦，他說：「初時諗住老婆開處境劇，時間會好穩定，後尾發現唔係，佢由朝拍到晚，返屋企已經好攰，我見佢做嘢咁辛苦，唔忍心佢仲要照顧個女，𠵱家搞到個老婆好辛苦，佢同個女冇乜時間見面，所以都有少少後悔畀佢接咗呢部劇。」
家輝續說：「我又要睇住個女，唔敢接嘢做，我自己嘅經理人約就快滿，出面都有公司傾緊合作，但都要等埋老婆返屋企至敢出街，我日日做帶子洪郎，帶個女去公園同食麥當勞，乜嘢都親力親為，我終於發現以前老婆照顧個女唔簡單。」至於關詠荷則說：「暫時開工喺時間上都算OK，唔算辛苦。」
採訪、攝影：魯萍、娛樂突發組
