此專欄針對新牌仔、雪藏牌、甚至學緊車的朋友而推出，幫大家解決駕駛時常遇到的問題，而提供指點的是香港駕駛學院車隊培訓及發展經理謝錦華先生，好多駕駛導師都是由他訓練出來，有高人分享路面經驗，初嘗駕駛放心又安全。
謝Sir首次醒大家的駕駛貼士，就是新牌仔最忌的斜路開車；其實新車、舊車的波箱設計都好有影響，分分鐘出現後溜。先說每當在斜路停車時要注意的事，首先車前車後必要預留一定空間，萬一前車或自己部車真的後溜，亦可及時將之弄停，避免發生碰撞。停車後，隨即入空波拉手掣，令車輛靜止。
在斜路開車，先要察看四周的交通情況，轉頭看看盲點、打燈；若開的是手波車，左腳踩着離合器，右腳踩住油門，加油至約2千轉，同時鬆開離合器至磨擦點，你會感到部車好想前進，最後鬆手掣便可。至於自動波車，則是先畀油後鬆手掣，便可避免後溜。
記者：陸伊琳
攝影：周旭文
