曼聯球星基斯坦奴朗拿度（C朗）今季大熟大勇，前晚喺4:1贏保頓場英超聯雖然冇波入，但就有3個助攻，不禁令人想起過去嘅「奧脫福大帝」簡東拿。
C朗今季聯賽至今以16球成為球隊入球王，射手榜僅以兩球落後入18球嘅車路士前鋒杜奧巴，暫列次席；助攻方面，佢更加係「冧巴溫」，暫以11個助攻居首。如果佢季尾囊括入球王同埋助攻王，就真係連簡東拿都要寫個服字畀佢！
不過，曼聯似乎唔係好當C朗係寶喇！皆因呢位球星要求以全隊最高嘅13萬鎊（約197萬港元）周薪續約，但球會就唔想做壞規矩；相比車仔波歷克同舒夫真高周薪都係13萬鎊，C朗嘅要求同叫價，其實好合理啫！
C朗值錢之處係後生，點似得32歲嘅隊長加利尼維利咁，對保頓打11分鐘就受傷離場。連領隊費格遜賽後都向球會施壓，話C朗會繼續留低，上面老細聽到未？
講開加利仔受傷，我求大俠就替英格蘭國家隊領隊麥卡倫頭痛，因為繼左後衞鬧兵荒後，𠵱家加利仔同曼城右閘米卡李察士都傷埋，幾可肯定缺陣嚟緊兩場歐國盃外圍賽，呢條後防線真係有排執。